काम छिटो गर्न अध्यादेश आवश्यक छ:असिम शाह

काठमाडौँ । प्रधानमन्त्री बालेन्द्र शाहका राजनीतिक सल्लाहकार असिम शाहले सरकारले ल्याएका अध्यादेशहरू जनताको हितका लागि भएको बताएका छन्। उनले सामाजिक सञ्जालमार्फत लेख्दै यी अध्यादेश कुनै व्यक्ति वा समूहको फाइदाका लागि नभई देशको काम छिटो र प्रभावकारी बनाउन ल्याइएको स्पष्ट पारे। उनका अनुसार धेरै कामहरू कानुनी जटिलता र ढिलाइका कारण अड्किने गरेका थिए, जसलाई हटाउन सरकारले अध्यादेशको बाटो रोजेको हो। मन्त्रिपरिषद्ले वैशाख १४ गते राष्ट्रपति रामचन्द्र पौडेलसमक्ष अध्यादेश प्रमाणीकरणका लागि पठाएको पनि उनले उल्लेख गरेका छन्।

असिम शाहले सरकार गठन भएपछि नै सुधारको आवश्यकता औंल्याइएको र केही पदाधिकारीलाई मार्गप्रशस्त गर्न भनिएको बताए। तर व्यवहारमा समस्या देखिएपछि ती अवरोध हटाउन अध्यादेश ल्याउनुपरेको उनको भनाइ छ। उनले यी कदमले काम गर्ने प्रक्रियामा देखिएका अवरोध हटाउने, निर्णय छिटो गर्ने र जनतालाई राम्रो सेवा दिने वातावरण बनाउने विश्वास व्यक्त गरेका छन्। उनका अनुसार पुराना र जटिल कानुनका कारण हुने ढिलाइ अन्त्य गरी देशलाई विकासतर्फ अघि बढाउन यो कदम महत्वपूर्ण हुनेछ।