नेप्सेको नयाँ व्यवस्था: अब ५ र ८ प्रतिशतमा मात्र सर्किट ब्रेक संशोधन लागू

काठमाडौं । नेपाल स्टक एक्सचेञ्ज ले सेयर बजारमा अत्यधिक उतारचढाव नियन्त्रण गर्न नयाँ सर्किट ब्रेकरसम्बन्धी व्यवस्था लागू गरेको छ । वैशाख ७ गतेदेखि लागू भएको संशोधित प्रावधानअनुसार अब सर्किट ब्रेकरको संख्या तीनबाट घटाएर दुईमा सीमित गरिएको छ । कारोबारको पहिलो दुई घन्टाभित्र बजार ५ प्रतिशतले घटबढ भएमा पहिलो सर्किट ब्रेक लाग्नेछ, जसपछि १५ मिनेटका लागि कारोबार स्थगित हुनेछ । त्यसपछि कुनै पनि समयमा बजार ८ प्रतिशतले घटबढ भए दोस्रो सर्किट ब्रेक लाग्दै बाँकी समयका लागि कारोबार पूर्ण रूपमा स्थगित गरिनेछ ।

यसअघि पहिलो घन्टामा ४ प्रतिशत, त्यसपछि ५ प्रतिशत र अन्त्यमा ६ प्रतिशतको उतारचढावमा तीन चरणमा सर्किट ब्रेक लाग्ने व्यवस्था रहेको थियो, जसमा क्रमशः २० मिनेट, ४० मिनेट र बाँकी समयका लागि कारोबार रोक्ने प्रावधान थियो । नयाँ व्यवस्थासँगै कारोबार विनियमावलीको चौथो संशोधन कार्यान्वयनमा आएको हो ।

संशोधनअन्तर्गत प्रि–ओपन चरणमा सेयर मूल्य घटबढको अधिकतम सीमा २ प्रतिशतबाट बढाएर ५ प्रतिशत र नियमित चरणमा १० प्रतिशतबाट बढाएर १५ प्रतिशत कायम गरिएको छ । साथै, लगानीकर्तालाई थप सुविधा दिन कारोबारपछि पनि खरिद–बिक्री आदेश दिन सकिने व्यवस्था थप गरिएको छ, जसले विशेषगरी विदेशमा रहेका नेपाली लगानीकर्तालाई सहजता प्रदान गर्ने अपेक्षा गरिएको छ ।