कामना सेवा विकास बैंकको साझेदारीमा निःशुल्क बस सेवा सञ्चालन

काठमाडौँ। पोखरा महानगरपालिकाले पोखरा अन्तर्राष्ट्रिय विमानस्थलदेखि अमरसिंह चोकसम्म आवतजावत गर्ने हवाई यात्रुका लागि निःशुल्क बस सेवा सञ्चालनमा ल्याएको छ। यात्रुलाई भरपर्दो, सहज र सुलभ आवागमन सुविधा उपलब्ध गराउने उद्देश्यले महानगरले दैनिक दुई वटा विद्युतीय बसमार्फत सेवा सुरु गरेको हो।

महानगरका अनुसार बिहान ६ बजेदेखि राति १० बजेसम्म सञ्चालन हुने उक्त बस सेवाले विमानस्थलदेखि मुख्य सडकसम्म पुग्नुपर्ने करिब दुई किलोमिटर दूरी सहज बनाउनेछ। यसअघि सो दूरी पार गर्न यात्रुहरूले विभिन्न कठिनाइ भोग्दै आएका थिए।

निःशुल्क बस सेवा सञ्चालनका लागि आवश्यक लागत खर्चमा कामना सेवा विकास बैंकले पनि साझेदारी गरेको छ। यस सम्बन्धमा महानगरका कार्यकारी अधिकृत ईश्वरीप्रसाद पोखरेल र बैंकका पोखरा क्षेत्रीय प्रमुख शिवकुमार ढकालबीच सम्झौता भएको छ। सम्झौताअनुसार सेवा आगामी असार मसान्तसम्म निःशुल्क रूपमा उपलब्ध गराइनेछ।

सम्झौता कार्यक्रममा बैंकका तर्फबाट स्थानीय तहसँगको सहकार्यलाई निरन्तरता दिने प्रतिबद्धता व्यक्त गरिएको थियो भने महानगरले सेवा सञ्चालनमा सहयोग पुर्‍याएकोमा बैंकप्रति आभार व्यक्त गरेको छ।