गोर्खा मिडियाका पत्रकारलाई सेवासुविधा दिन श्रम अदालतको आदेश

काठमाडौँ । बन्द भइसकेको गोर्खा मिडिया नेटवर्क प्रालिमा कार्यरत पत्रकारहरूको बक्यौता पारिश्रमिक तथा सेवासुविधा उपलब्ध गराउन श्रम अदालतले आदेश दिएको छ। श्रम अदालतका अध्यक्ष जनक पाण्डे र सदस्य शैलेन्द्रकुमार चौरसिया को इजलासले पत्रकारहरूको पक्षमा फैसला सुनाएको हो।

उक्त मिडियामा कार्यरत ९४ जना पत्रकारले लामो समयदेखि पारिश्रमिक नपाएको गुनासो गर्दै आएका थिए। उनीहरूलाई करिब एक वर्षसम्मको तलब तथा सेवासुविधा उपलब्ध नगरिएको विषय अदालतसम्म पुगेपछि अन्ततः कानुनबमोजिम रकम उपलब्ध गराउन आदेश जारी गरिएको हो।

पत्रकार बासु खड्का र गौतम रेग्मी ले दायर गरेको निवेदनमाथि सुनुवाइ गर्दै अदालतले श्रमसम्बन्धी प्रचलित कानुनअनुसार पाउनुपर्ने सम्पूर्ण सेवा सुविधा उपलब्ध गराउनुपर्ने ठहर गरेको छ।

यसैबीच, उक्त मिडियाका सञ्चालक गितेन्द्रबाबु राई हाल फरार अवस्थामा रहेका छन्। सोही संस्थामार्फत रकम अपचलन भएको आरोपमा रवि लामिछाने माथि समेत अनुसन्धान जारी रहेको जनाइएको छ।

अदालतको यो निर्णयले श्रम अधिकारको संरक्षण तथा सञ्चार क्षेत्रका श्रमिकहरूको हक सुनिश्चिततामा महत्वपूर्ण सन्देश दिएको विश्लेषण गरिएको छ।