आयात अवरुद्ध भएपछि सरकार लचिलो ,स्वघोषणा गरेर सामान छुटाउन पाइने

काठमाडौँ । आयातित सामानमा अनिवार्य रूपमा अधिकतम खुद्रा मूल्य (एमआरपी) राख्नुपर्ने नियमका कारण भन्सारमा समस्या देखिएपछि सरकारले तत्कालका लागि प्रक्रिया सहज बनाएको छ।

भन्सार विभागले नयाँ निर्देशन जारी गर्दै जाँचपास छिटो गर्न केही लचकता अपनाएको हो। अब औद्योगिक कच्चा पदार्थ, मेसिन, औजार र चाँडै बिग्रिने फलफूल तथा तरकारी जस्ता सामानमा एमआरपी नहुँदा पनि भित्र्याउन पाइनेछ।

पैठारीकर्ताले भन्सारमै एमआरपीको स्वघोषणा गर्नुपर्नेछ र सामान बजारमा बेच्नु अघि लेबल लगाउनुपर्ने सर्त राखिएको छ। यो निर्णयले भन्सारमा रोकिएका ट्रकहरूलाई राहत दिएको छ। कडा नियमका कारण आयात नै रोकिने अवस्था आएपछि सरकारले अस्थायी रूपमा नियम सहज बनाएको हो।