बुद्ध जयन्तीको अवसरमा गौतमबुद्ध अन्तर्राष्ट्रिय विमानस्थल सञ्चालन हुने

अव आकस्मिक अवतरणका लागि काठमाडौं नै आउनुपर्ने अवस्थाको अन्त्य हुने भएको छ। भैरहवास्थित गौतमबुद्ध अन्तर्राष्ट्रिय विमानस्थल सञ्चालनको तयारीले काठमाडौं विमानस्थलमा अवतरणमा समस्या आए पनि अब जहाजहरू भारतको लखनउ डाइभर्ट हुने समस्यासमेत अन्त्य हुन लागेको हो।

राष्ट्रिय गौरवको आयोजनाका रूपमा रहेको भैरहवास्थित गौतम बुद्ध अन्तर्राष्ट्रिय विमानस्थल सञ्चालनमा आउने भएसँगै आकासमै होल्ड बस्नुपर्ने तथा हवाई मार्गमा आपत्कालीन अवस्था आइहाले बन्दोबस्तीका सामग्रीसहितको विमानस्थल पछ्याउँदै अब काठमाडौं नै आइरहन पर्ने बाध्यताको समेत अन्त्य हुने भएको छ।

हाल ‘फोम तथा फाएर’ भेहिकलको सुविधासहितको आकस्मिक अवतरणको सुविधा त्रिभुवन अन्तर्राष्ट्रिय विमानस्थलमा मात्रै छ। सञ्चालनको तयारीमा रहेको गौतमबुद्व विमानस्थलमा पनि अन्तर्राष्ट्रिय नागरिक उड्डयन संगठनको मापदण्ड अनुसार विमानस्थलमा उड्ने अधिकतम ठूलो जहाजको क्षमता अनुसार आकस्मिक अवतरणका लागि चाहिने न्यूनतम मापदण्ड रहेकाले ल्यान्डिङ गियर नखुल्ने, तीव्र गतिमा आएको विमानको घर्षण धान्न नसक्ने, इन्धन ट्यांकमा आएका समस्या, विमानको पंखामा आएका समस्या, आगोजन्य समस्या तथा प्रतिकूल मौसमका कारण पनि काठमाडौंमा अवतरण हुन नसकेका जहाज अब भैरहवामै सुरक्षित अवतरण हुन सक्नेछन्। त्यहीँबाटै अन्तर्राष्ट्रिय उडान तथा अवतरण हुनेछन्। त्यसका लागि आगामी जेठ २ गते अर्थात् बुद्ध जयन्तीसम्म कुर्नुपर्ने भएको छ।