आज प्रेस स्वतन्त्रता दिवस मनाइँदै, पत्रकारको योगदानको सम्मान

काठमाडौँ । आज “शान्तिपूर्ण भविष्यको निर्माणः मानव अधिकार, विकास र सुरक्षाका लागि प्रेस स्वतन्त्रताको प्रवर्द्धन” भन्ने नारासहित विश्व प्रेस स्वतन्त्रता दिवस मनाइँदैछ।

यो दिवस प्रत्येक वर्ष मे ३ मा मनाइन्छ। करिब ३५ वर्षअघि नामिबियाको राजधानी विन्डहकमा भएको एक अन्तर्राष्ट्रिय सम्मेलनपछि संयुक्त राष्ट्रसङ्घ ले यस दिनलाई प्रेस स्वतन्त्रता दिवसका रूपमा मनाउने निर्णय गरेको हो।

यस दिनको मुख्य उद्देश्य प्रेस स्वतन्त्रताको महत्व सम्झाउनु हो। सञ्चार माध्यमले जनतालाई सही र आवश्यक सूचना दिने काम गर्छन्, त्यसैले यसको भूमिका निकै महत्वपूर्ण मानिन्छ। प्रेस स्वतन्त्र रह्यो भने मात्रै नागरिकले सही सूचना पाउन सक्छन्।

यो दिन सरकारले प्रेस स्वतन्त्रताको सम्मान गर्नुपर्छ भन्ने सन्देश दिने अवसर पनि हो। साथै पत्रकार र मिडियाकर्मीलाई आफ्नो जिम्मेवारी र आचारसंहिता पालना गर्न प्रेरित गरिन्छ। समाचार संकलनका क्रममा ज्यान गुमाएका पत्रकारहरूको योगदान सम्झने दिनका रूपमा पनि यो दिवसलाई विशेष महत्वका साथ मनाइन्छ।