काठमाडौँ महानगर र चलचित्र विकास बोर्डबीच फोटोग्राफी तालिमका लागि सहकार्य

काठमाडौँ । काठमाडौँ महानगरपालिकाले युवाहरुलाई सिपमूलक तथा रोजगारमूलक बनाउने उद्देश्यले फोटोग्राफी तालिम सञ्चालन गर्न चलचित्र विकास बोर्डसँग सहकार्य गरेको छ । महानगरपालिकाको ‘रोजगारी र आय वृद्धि काठमाडौँको समृद्धि’ गौरव योजनाअन्तर्गत आज सम्पन्न सम्झौतापत्रमा कार्यवाहक प्रमुख सुनिता डंगोलको रोहवरमा प्रमुख प्रशासकीय अधिकृत सरोज गुरागाईँ र बोर्डका अध्यक्ष दिनेशराज दाहालले हस्ताक्षर गर्नुभएको हो ।

सम्झौता पश्चात् बोल्दै कार्यवाहक प्रमुख डंगोलले काठमाडौँलाई चलचित्र निर्माणका लागि खुला स्टुडियोका रूपमा विकास गर्न महानगरपालिका र बोर्डबीच सहकार्य विस्तार गर्न सकिने बताउनुभयो । उहाँले चलचित्र र श्रव्यदृश्य माध्यममार्फत समाजका विविध पक्षलाई जीवन्त रूपमा प्रस्तुत गर्न सकिने उल्लेख गर्दै डवली, चोक तथा ननीहरूमा चलचित्र प्रदर्शन, निर्मातासँग अन्तरसंवाद, तथा समुदायस्तरमा चलचित्र तथा श्रव्यदृश्य उत्पादनसम्बन्धी क्षमता विकास तालिम सञ्चालन गर्ने योजना रहेको जानकारी दिनुभयो । साथै, भित्री सहरमा सञ्चालन हुँदै आएका यस्ता कार्यक्रमलाई बाहिरी वडाका पार्कसम्म विस्तार गरिने पनि उहाँले स्पष्ट पार्नुभयो ।

यसैक्रममा चलचित्र विकास बोर्डका अध्यक्ष दाहालले चलचित्रमार्फत सहरलाई जीवन्त बनाउने अभियानमा बोर्डको पूर्ण साथ रहने प्रतिबद्धता जनाउनुभयो । उहाँले फोटोग्राफी तालिमबाट सुरु गरिएको सहकार्यलाई आगामी दिनमा रचनात्मक उद्योगको विकास र प्रवर्द्धनसम्म विस्तार गर्न सकिने बताउनुभयो ।

सम्झौताअनुसार बोर्डले फोटोग्राफी कोर्षका आधारमा ४० जना सहभागीलाई तालिम प्रदान गर्नेछ । तालिम सञ्चालनका लागि आवश्यक लागतमध्ये ८० प्रतिशत महानगरपालिकाले व्यहोर्नेछ भने २० प्रतिशत लागत बोर्डले व्यहोर्ने सहमति भएको छ ।