गैरआवासीय नेपाली प्रतिनिधि मंडल प्रचण्ड भेट्न खुमलटारमा

काठमाडौँ, २८ असार । गैरआवासीय नेपाली संघको एक प्रतिनिधि मंडलले पूर्व प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल (प्रचण्ड) संग उहाँको निवास खुमलटारमा गई भेटघाट गरेको छ । प्रतिनिधि मंडलका पदाधिकारीहरुले सरकारले प्रतिनिधि सभामा पेश गर्न लागेको नागरिकता विधेयक बारे छलफल गरेका थिए ।

उक्त अवसरमा संघका कार्यकारी अध्यक्ष कुल आचार्य, अध्यक्ष डा. बद्रि केसी, संस्थापक अध्यक्ष डा. उपेन्द्र महतो लगायतका पदाधिकारीहरुले भेट गरेका हुन् । भेटमा नागरीकता विधेयक ल्याउनको लागि सहयोग गरेकोमा अध्यक्ष. प्रचण्ड लगायत नेकपा माओवादी केन्द्र प्रति एनआरएनएले धन्यवाद ब्यक्त गरेको छ । उहाँहरुले यो विधेयक अन्तिम चरणमा आइसकेकोले यसलाई पारित गराई विश्वमा रहेका सबै गैरआवासीय नेपालीहरुको भावनालाई संबोधन गर्न आग्रह गरे।

अध्यक्ष प्रचण्डले संविधानमा गैरआवासीय नेपाली नागरिकताको लागि जुन व्यस्था गरिएको छ त्यही अनुरुप विधेयक आउने जानकारी गराउनु भयो । यसमा आफ्नो र पार्टीको तर्फबाट  पूर्ण सहयोग रहने बताउनु भयो ।

कार्यक्रममा नेकपा माओवादी केन्द्रका बरिष्ठ नेता नारायणकाजी श्रेष्ठ, संघको तर्फबाट उपाध्यक्ष महेश कुमार श्रेष्ठ, युरोपका क्षेत्रीय संयोजक चिन्तामणि सापकोटा, युरोप क्षेत्रका युवा संयोजक रमेश काफ्ले, पूर्व आइसिसि सदस्य पशुपति भण्डारी लगायतका प्रतिनिधिहरु, गैरआवासीय नेपाली नागरिकता सम्बन्धी फोकल पर्सन सरोज दाहाल र सचिवालयका अधिकृत कुनाल मिश्राको उपस्थिति रहेको थियो ।