ग्लोबल आईएमईका कर्मचारीको मृत्यु: बैंकभित्र के भइरहेको थियो?नेपाली बैंकिङ क्षेत्रमा ‘वर्क प्रेसर’ फेरि बहसमा

काठमाडौँ ।ग्लोबल आईएमई बैंकका कर्मचारी पिताम्बर खड्का मृत अवस्थामा फेला परेका छन्। सोमबार बेलुकी आफ्नै घरको भुइँतल्लामा रहेको कोठामा उनले सिलिङमा डोरीको पासो लगाएर आत्महत्या गरेको प्रारम्भिक अनुसन्धानबाट खुलेको प्रहरीले जनाएको छ। पोष्टमार्टम रिपोर्टले पनि घटनालाई आत्महत्याका रूपमा पुष्टि गरेको बताइएको छ।

प्रहरीका अनुसार खड्कालाई झुण्डिएको अवस्थामा उनका बाबु महेश खड्काले देखेपछि प्रहरीलाई खबर गरेका थिए। त्यसपछि घटनास्थल पुगेको प्रहरीले वडा अध्यक्षको उपस्थितिमा घटनास्थल मुचुल्का तयार गरी शवलाई पोष्टमार्टमका लागि अस्पताल पठाएको थियो।

घटनाअघि खड्काले सामाजिक सञ्जालमार्फत बैंकका केही वरिष्ठ कर्मचारीहरूको नाम र तस्बिर सार्वजनिक गरेका थिए। उनले बैंकका प्रमुख कार्यकारी अधिकृत सुरेन्द्रराज रेग्मी, सहायक प्रमुख कार्यकारी अधिकृत दीपचन्द्र रेग्मी, मानव संसाधन प्रमुख अनामिका सिंह कुँवर तथा डेपुटी प्रमुख कार्यकारी अधिकृत सुमन पोखरेललाई उल्लेख गर्दै पोस्ट गरेको खुलेको छ। पोस्टमा एआईमार्फत तयार गरिएको तस्बिरसमेत राखिएको बताइएको छ।

प्रहरीले घटनास्थलबाट खड्काको मोबाइल फोनसहित अन्य सामग्री नियन्त्रणमा लिएर अनुसन्धान अघि बढाएको जनाएको छ। अनुसन्धानका क्रममा खड्काले सामाजिक सञ्जालमा उल्लेख गरेका वरिष्ठ कर्मचारी, उनी कार्यरत शाखाका कर्मचारी तथा सम्बन्धित प्रदेश प्रमुखसँग बयान लिने तयारी गरिएको प्रहरी स्रोतले जनाएको छ।

प्रारम्भिक जानकारीअनुसार केही समयअघि बैंक व्यवस्थापनले खड्कासँग स्पष्टिकरण मागेको थियो। त्यसपछि उनले राजीनामा दिएको बुझिएको छ। तर स्पष्टिकरण कुन विषयमा मागिएको थियो भन्नेबारे औपचारिक जानकारी सार्वजनिक गरिएको छैन। बैंकले राजीनामा स्वीकृत गरेकै दिन खड्काले ‘तिमीहरूले मलाई मार्यौ’ भन्ने सन्देश लेखेर आत्महत्या गरेको प्रारम्भिक विवरणमा उल्लेख छ।

खड्का यसअघि बैंकको चारआली शाखामा शाखा प्रबन्धकका रूपमा कार्यरत थिए। पछि उनलाई विराटनगरस्थित प्रादेशिक कार्यालयमा सरुवा गरिएको थियो। ग्लोबल आईएमई बैंकमा आउनुअघि उनी ज्योति विकास बैंकमा कार्यरत रहेको खुलेको छ।

घटनापछि उत्पन्न परिस्थिति तथा त्यसले बैंकिङ क्षेत्रमा पार्न सक्ने प्रभावबारे बैंकको वरिष्ठ व्यवस्थापन तहमा आन्तरिक छलफल भइरहेको स्रोतले जनाएको छ। प्रहरीले घटनाको सबै पक्षबाट थप अनुसन्धान जारी रहेको बताएको छ।