सरकारी सम्पत्ति हिनामिनाको आशंका, एनसेल कार्यालयमा सीआईबीको छापा

काठमाडौं। नेपाल प्रहरीको केन्द्रीय अनुसन्धान ब्यूरो (सीआईबी)ले दूरसञ्चार सेवा प्रदायक एनसेलको मुख्यालयमा छापा मारेको छ। स्मार्ट टेलिकमको सम्पत्ति तथा लिलामी प्रक्रियामा अनियमितता भएको आशंकामा अनुसन्धान अगाडि बढाउँदै सीआईबीले उक्त कदम चालेको हो।

अनुसन्धानमा संलग्न स्रोतका अनुसार स्मार्ट टेलिकमको अनुमति पत्र खारेज भइसकेपछि सरकारी स्वामित्वमा आउनुपर्ने सम्पत्तिलाई निजी स्वार्थअनुसार खरिद गर्ने प्रयास भएको आशंका गरिएको छ। सोही प्रकरणमा एनसेलको संलग्नता देखिएको प्रारम्भिक निष्कर्षपछि सीआईबीले कम्पनीको मुख्यालयमा पुगेर कागजात तथा सम्बन्धित विवरण संकलन गरेको जनाएको छ।

नेपाल दूरसञ्चार प्राधिकरणले सरकारलाई बुझाउनुपर्ने बक्यौता रकम नतिरेपछि स्मार्ट टेलिकमको अनुमति पत्र खारेज गरिसकेको थियो। कानुनी व्यवस्थाअनुसार अनुमति पत्र खारेज भइसकेको कम्पनीको पूर्वाधार तथा सम्पत्ति सरकारी स्वामित्वमा आउनुपर्ने भए पनि मिलेमतोमार्फत त्यसलाई निजी लाभका लागि प्रयोग गर्न खोजिएको आशंका अनुसन्धानमा उठाइएको छ।

सीआईबीको प्रारम्भिक अनुसन्धानमा स्मार्ट टेलिकमका सञ्चालक र एनसेलका केही उच्च अधिकारीबीच गोप्य समझदारी गरी बैंकमार्फत न्यून मूल्यमा सम्पत्ति लिलामी गराएर नियन्त्रणमा लिने योजना बनाइएको संकेत भेटिएको बताइएको छ। यससँग सम्बन्धित आर्थिक कारोबार, बैंकिङ प्रक्रिया तथा आन्तरिक कागजातमाथि पनि अनुसन्धान केन्द्रित गरिएको छ।

यसअघि नै सीआईबीले स्मार्ट टेलिकमका केही पदाधिकारीलाई पक्राउ गरी सरकारी सम्पत्ति हिनामिना तथा आपराधिक विश्वासघातसम्बन्धी मुद्दामा अनुसन्धान अघि बढाइसकेको छ। सोही अनुसन्धानको सिलसिलामा थप प्रमाण संकलन गर्न एनसेल कार्यालयमा छापा मारिएको जनाइएको छ।