नेपालको सूचना प्रविधि क्षेत्रमा सुधारका लागि प्रधानमन्त्रीप्रति क्यान महासंघको आभार

काठमाण्डौ। क्यान महासंघले सूचना प्रविधि क्षेत्रको विकासका लागि नेपाल सरकारले ल्याएको नीतिगत सुधारप्रति आभार प्रकट गरेको छ। महासंघका अनुसार यस्ता सुधारहरूले सूचना प्रविधि कम्पनीहरूलाई अन्तर्राष्ट्रिय मञ्चमा प्रतिस्पर्धा गर्न सघाउने, विदेशमा लगानी विस्तार गर्न प्रेरित गर्ने र स्वदेशी बजारलाई आत्मनिर्भर बनाउन मद्दत गर्ने विश्वास व्यक्त गरिएको छ।

महासंघले हालै सम्पन्न ऐतिहासिक “आईटी मिट अप” कार्यक्रममा प्रधानमन्त्री केपी शर्मा ओलीलाई यस क्षेत्रमा भएका प्रगतिका लागि धन्यवाद व्यक्त गरेको थियो। महासंघका अध्यक्ष सुनैना घिमिरे पाण्डेले प्रधानमन्त्रीज्यूलाई शुभकामना व्यक्त गर्दै, यस्ता नीतिहरूले नेपाललाई डिजिटल युगतर्फ अगाडि बढाउन थप मार्गप्रशस्त गर्ने उल्लेख गरेकी थिइन्।

कार्यक्रममा महासंघका निवर्तमान अध्यक्ष रणजित कुमार पोद्दार, उपाध्यक्षहरू चिरञ्जीवी अधिकारी, शेखरनाथ दुलाल, सिर्जना श्रेष्ठ, महासचिव चन्द्र विलास भुर्तेल, तथा कार्यकारिणी सदस्यहरू हेमपाल श्रेष्ठ, राजु कट्टेल र राजु बानियाले पनि सहभागिता जनाएका थिए।

महासंघले यस्तो पहलले सूचना प्रविधि क्षेत्रका नयाँ सम्भावनाहरूको ढोका खोल्ने विश्वास लिएको छ। साथै, यस क्षेत्रमा रहेका अवसरहरूको उचित सदुपयोग गर्न सरकारसँग सहकार्य गर्न आफू तयार रहेको जनाएको छ।