पुँजी बजारमा एक वर्षभित्र उल्लेखनीय सुधार, नेप्से र बजार पुँजीकरण दुबै उकालो

काठमाण्डौ। २०८० चैत मसान्तसम्म २०२५.७१ अंकमा रहेको नेप्से सूचकाङ्ग २०८१ चैत मसान्तसम्म आइपुग्दा बढेर २६६२.०८ अंकमा पुगेको छ। यस अवधिमा धितोपत्र बजारको पुँजीकरण पनि उल्लेखनीय रूपमा बढेको छ।

२०८० चैतमा रु. ३२१२ अर्ब १ करोड रहेको बजार पुँजीकरण २०८१ चैतमा बढेर रु. ४४२५ अर्ब ४० करोडमा पुगेको हो।

नेपाल स्टक एक्सचेन्ज (नेप्से) मा सूचीकृत कम्पनीहरूको संख्या २७० पुगेको छ। यसमध्ये १३२ वटा बैंक, वित्तीय संस्था तथा बीमा कम्पनीहरू छन् भने अन्य कम्पनीहरूमा जलविद्युत् (२२), उत्पादन तथा प्रशोधन उद्योग (७), होटल (७), लगानी कम्पनी (९), व्यापारिक संस्था (४) र अन्य समूहका कम्पनीहरू (७) रहेका छन्।

२०८० चैतमा सूचीकृत कम्पनीहरूको संख्या २७२ रहेकोमा २०८१ चैतमा यो संख्या केही घटेर २७० पुगेको हो।

सूचीकृत कम्पनीहरूको पुँजीकरण हेर्दा बैंक, वित्तीय संस्था तथा बीमा कम्पनीहरूको हिस्सा सबैभन्दा धेरै ५२.७ प्रतिशत रहेको छ। त्यसपछि जलविद्युत् कम्पनीको १५.१ प्रतिशत, लगानी कम्पनीको ७.९ प्रतिशत, व्यापारिक संस्थाको ५.८ प्रतिशत, उत्पादन तथा प्रशोधन उद्योगको ५.४ प्रतिशत, होटलको २.६ प्रतिशत र अन्य समूहको १०.५ प्रतिशत हिस्सा रहेको छ।

२०८१ चैत मसान्तसम्म नेप्सेमा सूचीकृत ८ अर्ब ७२ करोड कित्ता शेयरहरूको कुल चुक्ता पूँजी रु. ८५९ अर्ब ४५ करोड पुगेको छ।

आर्थिक वर्ष २०८१/८२ को नौ महिनाको अवधिमा विभिन्न प्रकारका धितोपत्रहरू नेप्सेमा सूचीकृत भएका छन्। त्यसअनुसार, रु. १९ अर्ब ७७ करोड बराबरको बोनस शेयर, रु. १५ अर्ब ४१ करोड बराबरको साधारण शेयर, रु. ११ अर्ब ६५ करोडको हकप्रद शेयर, रु. १ अर्ब २५ करोडको म्युचुअल फन्ड, रु. १० करोड ६९ लाखको एफपीओ र रु. ३ अर्ब ९६ करोड बराबरको अन्य शेयर गरी उल्लेख्य परिमाणमा नयाँ धितोपत्र सूचीकृत भएका छन्।

समीक्षा अवधिभर नेपाल धितोपत्र बोर्डले रु. २८ अर्ब ५८ करोड बराबरका विभिन्न धितोपत्र सार्वजनिक निष्काशनका लागि अनुमति दिएको छ।

बोर्डले म्युचुअल फण्डमा रु. ११ अर्ब ६० करोड, हकप्रद शेयरमा रु. १० अर्ब ३७ करोड, डिबेन्चरमा रु. ४ अर्ब ८२ करोड र साधारण शेयरमा रु. १ अर्ब ७९ करोड बराबरको सार्वजनिक निष्काशन स्वीकृत गरेको हो।