रास्वपा महाधिवेशन:विदेशमा रहेका प्रतिनिधिले मोबाइलबाटै भोट हाल्न मिल्ने

काठमाडौँ ।  राष्ट्रिय स्वतन्त्र पार्टी (रास्वपा) को पहिलो महाधिवेशनमा विदेशमा रहेका प्रतिनिधिहरूले पनि मतदान गर्न पाउने भएका छन्। उनीहरूका लागि पार्टीले अनलाइनमार्फत मतदान गर्ने व्यवस्था गरेको छ।

रास्वपाको मोबाइल एप प्रयोग गरेर विदेशमा रहेका प्रतिनिधिहरूले आफू जहाँ भए पनि महाधिवेशनको मतदान प्रक्रियामा सहभागी हुन सक्नेछन्। विदेशस्थित नेपाली सम्पर्क विभागबाट प्रतिनिधि चुनिए पनि महाधिवेशनमा प्रत्यक्ष उपस्थित हुन नसक्नेहरूलाई लक्षित गरेर यो व्यवस्था गरिएको हो।

पार्टीका अनुसार प्रवासबाट १६३ जना प्रतिनिधि महाधिवेशनमा सहभागी छन्। नेपालमा उपस्थित प्रतिनिधिहरूका लागि भने मतदानलाई छिटो र सहज बनाउन ८० वटा विद्युतीय मतदान मेसिन (इलेक्ट्रोनिक भोटिङ मेसिन) प्रयोग गरिनेछ।

आइतबारदेखि सुरु भएको महाधिवेशनको अवधि एक दिन थपिएकाले मतदान बुधबार हुने तय भएको छ। सुरुमा सभापति र केन्द्रीय सदस्यका लागि मतदान गर्ने कार्यक्रम रहेको थियो। तर सभापति पदमा रवि लामिछाने निर्विरोध चयन भइसकेकाले अब केवल ९९ जना केन्द्रीय सदस्य चयनका लागि मतदान हुनेछ। प्रतिनिधिहरूले विद्युतीय मेसिन तथा अनलाइन प्रणालीमार्फत आफ्नो मत दिनेछन्।