बाँदर आतंक नियन्त्रण गर्न दिक्तेल नगरपालिकाले छुट्यायो ४५ लाख रुपैयाँ

काठमाडौँ । खोटाङको दिक्तेल रूपाकोट मझुवागढी नगरपालिकाले बाँदरको आतंकबाट किसानलाई राहत दिन नयाँ कार्यक्रम ल्याएको छ। आगामी आर्थिक वर्ष २०८३/८४ का लागि नगरपालिकाले प्रत्येक वडा तथा टोलमा ‘बाली हेरालु’ राख्ने व्यवस्था गर्न बजेट छुट्याएको हो। नगरपालिकाले बाँदर तथा अन्य वन्यजन्तुले खेतीबालीमा पुर्‍याउने क्षति कम गर्न रु ४५ लाख विनियोजन गरेको छ।नगर प्रमुख तीर्थराज भट्टराईका अनुसार बाँदरको समस्या समाधानका लागि अल्पकालीन र दीर्घकालीन योजना बनाइएको छ। यसका लागि संघीय सरकार र छिमेकी स्थानीय तहहरूसँग पनि समन्वय गरिनेछ।

नगर उपप्रमुख विशन राईले आगामी वर्षका लागि कुल रु एक अर्ब एक करोड ५५ लाखभन्दा बढी बजेट प्रस्तुत गर्नुभएको छ। कृषि क्षेत्रलाई विशेष प्राथमिकतामा राखिएको छ। साथै, ‘किसानलाई के चाहिन्छ?’ नामक कार्यक्रम पनि सञ्चालन गरिनेछ। यस अन्तर्गत किसानको घरदैलोमै पुगेर प्राविधिक सेवा दिने, उन्नत बीउबिजन वितरण गर्ने तथा एकीकृत घुम्ती शिविर सञ्चालन गर्ने योजना छ।

यसैबीच, खोटाङ जिल्लाका अन्य स्थानीय तहहरूले पनि आगामी आर्थिक वर्षका लागि नीति तथा कार्यक्रम तथा बजेट सार्वजनिक गरिरहेका छन्। हलेसी तुवाचुङ नगरपालिका र केपिलासगढी गाउँपालिकासहित अधिकांश स्थानीय तहले कृषि, विकास र जनसेवालाई प्राथमिकतामा राखेर बजेट ल्याएका छन्।