रास्वपा महाधिवेशन:प्रतिनिधिलाई कार्ड वितरण, एक बजेबाट बन्दसत्र सुरु हुने

काठमाडौँ । महाधिवेशन प्रतिनिधि छनोटमा देखिएको विवाद समाधान भएपछि राष्ट्रिय स्वतन्त्र पार्टी (रास्वपा) को बन्दसत्र अब सुरु हुने भएको छ। रास्वपा संसदीय दलका उपनेता गणेश पराजुलीले दिउँसो एक बजेबाट बन्दसत्र सुरु हुने बताएका छन् ।  प्रतिनिधिको नाम दोहोरिएको र व्यवस्थापनसम्बन्धी समस्या देखिएपछि सोमबार बन्दसत्र रोकिएको थियो।

पार्टीका महामन्त्रीहरू कर्विन्द्र बुर्लाकोटी र भूपदेव शाहले निर्वाचन समिति र असन्तुष्ट पक्षसँग छलफल गरेर विवाद समाधान गरेका हुन्।

महामन्त्री भूपदेव शाहका अनुसार प्रतिनिधिहरूको नामावलीमा देखिएको दोहोरोपनसमेत मिलाइएको छ। अब दर्ता प्रक्रिया (रजिस्ट्रेसन) छिट्टै खुल्नेछ। विवाद समाधान भएपछि बन्दसत्रमा सहभागी हुने प्रतिनिधिको संख्या करिब ३,८०० देखि ४,००० पुग्ने अनुमान गरिएको छ।

महामन्त्री कर्विन्द्र बुर्लाकोटीले उम्मेदवारी दर्ता, दाबी विरोध र मतदाता नामावलीसम्बन्धी कामहरू आजै साँझसम्म सकिने जानकारी दिएका छन्। उनका अनुसार मतदान पनि आजै सुरु हुन सक्ने सम्भावना छ।

बन्दसत्रको प्रतिवेदन निर्वाचन समितिलाई बुझाइएपछि औपचारिक प्रक्रिया अघि बढ्नेछ। प्रतिनिधिको संख्या अपेक्षाभन्दा बढी भएकाले प्रवेशपत्र व्यवस्थापनलगायत प्राविधिक तयारी समयमै पूरा हुन नसक्दा बन्दसत्र ढिलाइ भएको हो।