धुलिखेल–खावा सडक निर्माण तीव्र बनाउन असार १४ देखि २८ गतेसम्म टिपर सञ्चालनमा रोक

काठमाडौँ । धुलिखेल–खावा सडकखण्डको निर्माण र स्तरोन्नति कार्य छिटो पूरा गर्न यातायात व्यवस्थामा नयाँ नियम लागू गरिएको छ। अब यस सडकमा टिपर (ठूला ट्रक) पूर्ण रूपमा बन्द गरिने भएको छ।

काभ्रेपलाञ्चोकका प्रमुख जिल्ला अधिकारीको अध्यक्षतामा बसेको बैठकले असार १४ गतेदेखि २८ गतेसम्म टिपर सञ्चालन रोक्ने निर्णय गरेको हो। निर्माण कार्यलाई सहज बनाउन सडकको काम तीव्र रूपमा अघि बढाउन यस्तो निर्णय गरिएको बताइएको छ।

त्यस्तै, अन्य सवारीसाधनका लागि पनि रातिको समयमा प्रतिबन्ध लगाइएको छ। साँझ ७ बजेदेखि बिहान ५ बजेसम्म एम्बुलेन्स बाहेक सबै सवारी साधन चलाउन पाइने छैन।

सडक डिभिजन कार्यालयका अनुसार बाँकी काम गर्न एक लेन मात्र खुला राख्नुपर्ने अवस्था छ, त्यसैले सवारी व्यवस्थापन कडाइ गरिएको हो।