रातारात चितवनपछि रविलाई पोखरा लगियो

काठमाडौँ , मङ्सिर २० । सहकारीको रकम अपचलन मुद्दामा पक्राउ परेका राष्ट्रिय स्वतन्त्र पार्टी रास्वपाका सभापति रवि लामिछानेलाई पोखरा लगिएको छ। सहारा सहकारीको रकम हिनामिना अभियोगमा चितवनमा हिजो अबेर बयान सकिएपछि राति ३ः३० बजे नै पोखरा लगिएको हो । चितवनमा हिजो दिनभर रास्वपाका कार्यकर्ताले प्रदर्शन गर्दा झडप समेत भएको थियो।

बयानका लागि आज बधुबार लामिछानेलाई जिल्ला सरकारी वकिल कार्यालय लैजाने क्रममा उनका समर्थक र प्रहरीबीच झडप भएको थियो । लामिछानेको रिहाइ र कारबाहीको माग गर्दै दुई छुट्टाछुट्टै र्‍याली आयोजित भएका छन्। एक र्‍यालीमा लामिछानेका समर्थकहरूले बिना शर्त रिहाइको माग गर्दै जिल्ला प्रहरी कार्यालय अगाडि प्रदर्शन गरेका छन्। प्रदर्शनका क्रममा ढुङ्गा प्रहार भएपछि प्रहरीले पानीको फोहोरा, अश्रुग्यास र लठ्ठी प्रहार गरेर स्थिति नियन्त्रणमा लिने प्रयास गरेका छन्।

समर्थकहरूले लामिछाने निर्दोष भएको र राजनैतिक पूर्वाग्रहका कारण थुनामा रहेका भन्दै उनको रिहाइको माग गरेका छन्। यसैबीच,लामिछानेविरुद्ध पर्सामा पनि पक्राउ पुर्जी जारी भएको छ। वीरगञ्जको सानो पाइला सहकारीको बचत अपचलनको विषयमा अनुसन्धान गर्न बुधबार पर्सा जिल्ला अदालतले लामिछानेलाई पक्राउ अनुमति दिएको छ ।