महाधिवेशनपछि विवाद नगर्न प्रदीप ज्ञवालीको आग्रह

काठमाडौँ । नेकपा एमालेका नेता प्रदीप ज्ञवालीले महाधिवेशनपछि फेरि पार्टीभित्र असन्तुष्टि देखिनु र छुट्टाछुट्टै भेला गर्नु पार्टीका लागि राम्रो नहुने बताएका छन्। उनले महाधिवेशनलाई पार्टीको सबैभन्दा ठूलो र अन्तिम निर्णय गर्ने निकाय मान्नुपर्नेमा जोड दिएका छन्। महाधिवेशनका निर्णय नमानेर फेरि पुराना विषय उठाइरहने हो भने पार्टी कमजोर हुँदै जाने उनको भनाइ छ।

ज्ञवालीका अनुसार नेतृत्वको वैधता र स्वीकार्यतामाथि उठेका प्रश्नको उत्तर दिनकै लागि एक वर्ष अगावै महाधिवेशन गरिएको हो। महाधिवेशनले ती सबै प्रश्नको स्पष्ट जवाफ दिइसकेको भन्दै उनले अब पुराना विवाद बोकेर हिँड्नु निरर्थक हुने बताए।

उनले पार्टी अहिले संगठित अवस्थामा आएको दाबी गर्दै अब आन्तरिक झगडाभन्दा लोकतन्त्र, संविधानको रक्षा, सुशासन, स्थिरता र समृद्धिजस्ता राष्ट्रिय मुद्दामा ध्यान दिनुपर्ने बताए। यसैबीच पूर्व राष्ट्रपतिबाट राजतन्त्र पुनर्स्थापनासम्बन्धी अभिव्यक्ति आउनु आपत्तिजनक भएको भन्दै ज्ञवालीले गणतन्त्र र लोकतान्त्रिक व्यवस्थाप्रति यस्ता भनाइ स्वीकार्य नहुने स्पष्ट पारे।