तीन रातो कार्डबीच मेक्सिकोको विजयी सुरुआत, दक्षिण अफ्रिकामाथि २–० को जित

काठमाडौं । फिफा विश्वकप २०२६ को उद्घाटन खेलमा आयोजक मेक्सिकोले नौ खेलाडीमा सीमित दक्षिण अफ्रिकामाथि २–० को सहज जित निकाल्दै प्रतियोगिताको सुखद सुरुआत गरेको छ। तीन रातो कार्ड देखाइएको अत्यन्तै नाटकीय खेलमा मेक्सिकोले सुरुदेखि नै दबाब कायम राख्दै स्पष्ट वर्चस्व प्रदर्शन गरेको थियो।

खेलको नवौँ मिनेटमै दक्षिण अफ्रिकाका मध्यपङ्क्तिका खेलाडी याया सिथोलेले बल गुमाएपछि प्राप्त अवसरलाई जुलियन किनोनेसले गोलमा परिणत गर्दै मेक्सिकोलाई अग्रता दिलाएका थिए। पहिलो हाफभर मेक्सिकोले लगातार आक्रमण बुन्दै थप गोलका अवसर सिर्जना गरे पनि गोलरक्षक रक्षापङ्क्तिको प्रदर्शनका कारण अग्रता फराकिलो बनाउन सकेन।

दोस्रो हाफमा दक्षिण अफ्रिकाको अवस्था झन् कठिन बन्यो। याया सिथोलेले गोलतर्फ अघि बढिरहेका खेलाडीलाई लडाएपछि सिधै रातो कार्ड पाएर मैदान छाड्नुपरेको थियो। त्यसपछि १० खेलाडीमा सीमित दक्षिण अफ्रिकाविरुद्ध मेक्सिकोले खेलमाथिको नियन्त्रण अझ बलियो बनाएको थियो।

मेक्सिकोका अनुभवी खेलाडी राउल जिमेनेजले पछिल्लो पोस्ट नजिकबाट हेडमार्फत दोस्रो गोल गर्दै टोलीको जित सुनिश्चित गरे। गम्भीर टाउको चोटपछि विश्वकपमा गरेको यो गोल उनका लागि विशेष क्षण बनेको थियो।

खेलको अन्त्यतिर भिडियो सहायक निर्णय प्रणालीको हस्तक्षेपपछि दक्षिण अफ्रिकाका वैकल्पिक खेलाडी थेम्बो ज्वानेले विपक्षी खेलाडीको अनुहारमा प्रहार गरेको पुष्टि भएपछि अर्को रातो कार्ड देखाइयो। त्यससँगै दक्षिण अफ्रिका नौ खेलाडीमा झरेको थियो।

यद्यपि खेलमा विवाद पनि कम रहेन। दक्षिण अफ्रिकाको प्रतिआक्रमण रोक्ने क्रममा मेक्सिकोका रक्षक सेजार मोन्टेसलाई पनि रातो कार्ड देखाइएपछि मैदानमा तनावपूर्ण अवस्था सिर्जना भएको थियो। निर्णयमाथि पुनरावलोकन भए पनि रेफ्रीले आफ्नो निर्णय यथावत् राखेका थिए।

आयोजक टोलीको प्रभावशाली प्रदर्शनसँगै मेक्सिकोले समूह चरणमा महत्वपूर्ण तीन अंक जोड्दै उपाधि यात्राको आत्मविश्वासपूर्ण सुरुआत गरेको छ।