उबर नेपालमा भित्रियो, अमेरिकी दूतावासले भन्यो– ‘नेपालप्रतिको विश्वासको संकेत’

काठमाडौं । विश्वप्रसिद्ध राइड–सेयरिङ कम्पनी उबरले नेपालमा औपचारिक रूपमा सेवा सुरु गरेको छ। कम्पनीको नेपाल प्रवेशलाई देशको विकसित हुँदै गएको डिजिटल अर्थतन्त्रका लागि महत्वपूर्ण उपलब्धिका रूपमा हेरिएको छ।

उबरको नेपाल प्रवेशको अवसरमा आयोजित कार्यक्रममा नेपालस्थित अमेरिकी दूतावासकी कार्यवाहक उपप्रमुख चेलन ब्लिसले सम्बोधन गर्दै उबरको नेपालमा लगानी र सेवा विस्तारको निर्णय नेपालप्रतिको विश्वासको स्पष्ट संकेत भएको बताइन्। उनले नेपालले पछिल्ला वर्षहरूमा डिजिटल रूपान्तरणको दिशामा उल्लेखनीय प्रगति गरिरहेको उल्लेख गर्दै उबरको आगमनले उपभोक्तालाई थप विकल्प, नवप्रवर्तनलाई प्रोत्साहन तथा नयाँ आर्थिक अवसर सिर्जना गर्ने विश्वास व्यक्त गरिन्।

उनका अनुसार नेपालमा उबरको सेवा विस्तारले प्रविधिमैत्री सेवा प्रणालीलाई थप मजबुत बनाउनेछ भने डिजिटल अर्थतन्त्रको विस्तारमा समेत योगदान पुग्ने अपेक्षा गरिएको छ। अमेरिकी कम्पनीहरूको नेपालप्रतिको बढ्दो चासोले द्विपक्षीय आर्थिक सम्बन्धलाई समेत नयाँ उचाइमा पुर्‍याउने उनले बताइन्।

कार्यक्रममा अमेरिकी पक्षले नेपालको डिजिटल विकास, प्रविधि नवप्रवर्तन तथा निजी क्षेत्रको विस्तारमा निरन्तर सहयोग रहने प्रतिबद्धता पनि व्यक्त गरेको थियो। उबरको नेपाल प्रवेशलाई स्थानीय बजारमा प्रविधिमा आधारित यातायात सेवाको प्रतिस्पर्धा बढाउने तथा सेवा गुणस्तर सुधारमा योगदान पुर्‍याउने कदमका रूपमा हेरिएको छ।

उबरले नेपालमा सेवा सञ्चालन सुरु गरेसँगै डिजिटल प्लेटफर्ममार्फत यातायात सेवा प्राप्त गर्ने उपभोक्ताको विकल्प विस्तार हुनुका साथै रोजगारी तथा उद्यमशीलताका नयाँ अवसर सिर्जना हुने अपेक्षा  छ।