जसपाले धरानमा गोष्ठीमार्फत आन्दोलनको अवधारणा पत्र सार्वजनिक गर्ने

काठमाडौं । जनता समाजवादी पार्टी (जसपा) नेपालले कोशी प्रदेशको नाम र केबलकार खारेजी तथा पहिचानको आन्दोलनबारे कार्यदिशा तय गर्न कार्यशाला गोष्ठी गर्ने भएको छ। पार्टीका सह–अध्यक्ष रकम चेम्जोङ संयोजक रहेको आन्दोलन परिचालन तथा समन्वय समितिको बैठकले गोष्ठी बैशाख २० गते धरान, सुनसरीमा गर्ने निर्णय गरेको हो। गोष्ठीमा कोशी प्रदेशअन्तर्गतका केन्द्रीय पदाधिकारी, कार्यकारिणी सदस्य तथा प्रदेश समिति सहभागी हुनेछन्।

प्रचार विभाग प्रमुख पूर्ण बस्नेतका अनुसार गोष्ठीको व्यवस्थापनका लागि ताजूब लिम्बूको संयोजकत्वमा व्यवस्थापन समिति, कुन्ता राईको संयोजकत्वमा आर्थिक समिति र कमन देवान याक्खाको संयोजकत्वमा प्रचार समिति गठन गरिएको छ। कार्यक्रममा आन्दोलनको अवधारणा पत्र पनि प्रस्तुत गरिने जनाइएको छ।