हायात होटल पुनः सञ्चालनमा ल्याउन एक वर्ष लाग्ने

काठमाडौँ । पाँचतारे होटल तारागाउँ रिजेन्सी होटल्स लिमिटेड (हायात रिजेन्सी काठमाडौं) ले जेनजी आन्दोलनका क्रममा होटलमा व्यापक क्षति पुगेको भन्दै पुनर्निर्माणपछि करिब एक वर्षमा सञ्चालनमा आउने जनाएको छ।

होटलका कार्यकारी निर्देशक सुरेशलाल श्रेष्ठद्वारा जारी विज्ञप्तिमा आन्दोलनका क्रममा भएको तोडफोड, लुटपाट र आगजनीबाट होटलका अतिथि कक्ष, कार्यकक्ष, रिसेप्सन, लबी, रेष्टुरेन्ट, बैंक्वेट, चैत्यलगायत संरचनामा ठूलो क्षति पुगेको उल्लेख छ। सोही कारण होटल हाल पूर्ण रूपमा बन्द रहेको जनाएको छ।

विज्ञप्तिमा भनिएको छ, “हाल क्षतिको पूर्ण मूल्यांकन भइरहेको छ। मूल्यांकनपछि होटलको स्तरोन्नति र पुनर्निर्माण गरी अझ विस्तारित र उत्कृष्ट सेवासहित यथाशीघ्र पुनः सञ्चालनमा ल्याउने प्रतिबद्धता व्यक्त गर्दछौं।”

होटलले पुनर्निर्माण र स्तरोन्नतिको सम्पूर्ण प्रक्रिया पूरा गर्न कम्तीमा एक वर्ष लाग्ने जनाएको छ। साथै, आन्दोलनका क्रममा भएको क्षतिप्रति प्रधानमन्त्री सुशीला कार्की र अर्थमन्त्री रामेश्वरप्रसाद खनालले आवश्यक सरकारी साथ र सहयोग प्रदान गर्ने आश्वासन दिएकोप्रति आभार व्यक्त गरेको छ।

होटलले पुनः सञ्चालनपछि नेपालको पर्यटन क्षेत्रको प्रतिष्ठा उच्च बनाउने र सरकारी राजस्वमा योगदान पु¥याउँदै देशको आर्थिक विकासमा थप योगदान गर्ने दृढ संकल्प व्यक्त गरेको छ।