काठमाडौं । अर्थमन्त्री जनार्दन शर्मामाथि प्रश्न गदै नेकपा एमालेका उपाध्यक्ष तथा पूर्व अर्थमन्त्री विष्णुप्रसाद पौडेलले सामाजिक सुरक्षा भत्ता पाँच हजार किन नपुर्याएको भनी सोधेका छन्।
मंगलबार प्रतिनिधि सभाको बैठकमा जारी बजेटमाथि छलफलमा सहभागी हुँदै उनले बजेटमा वितरणमुखी कार्यक्रमहरू भएको भन्दै सो विषयलाई भने किन छाडिएको भन्दै प्रश्न उठाएका हुन्।
‘यता बाँड्ने, त्यता बाँड्ने, उता बाँड्ने। पर्याप्त मात्रामा वितरणमुखी छ यो कार्यक्रम। सबैतिर वितरण नै वितरण छन्। धेरै उदारमना नेतृत्व पाएको छ, बजेटले भन्ने कुरा छर्लङ्ग छ। तर, यति धेरै वितरणमुखी बजेट ल्याउन सक्ने अवस्था हो भनेदेखि सामाजिक सुरक्षा भत्ता पाँच हजार किन नपुर्याएको ?’, उनले प्रश्न गरे।
पौडेलले चुनावमा एमाले र माओवादीले संयुक्त चुनावी घोषणापत्र सार्वजनिक गरेको स्मरण गराउँदै त्यसमा आफूहरूले सुरक्षा भत्ता पाँच वर्षमा पाँच हजार पुर्याउने भनेर दाबी गरेको बताए।
‘स्वभावैले त्यो दाबीसँग वर्तमान अर्थमन्त्रीजी दिलदेखि नै सहमत हुनुहुन्थ्यो भन्ने मलाई थाहा छ,’ उनले भने।
पौडेलले यति धेरै वितरणमुखी बजेट अघि सार्न सक्ने सरकारले एक ढंगले जनतासँग गरिएको प्रतिबद्धतालाई किन अनुशरण नगरिएको? भन्दै प्रश्न दोहोर्याए। उनको प्रश्न छ, ‘किन सामाजिक सुरक्षा भत्तालाई पाँच हजार बनाउने जिम्मेवारीबाट पन्छिएको?’
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
