थाइल्यान्डसँग पराजित हुँदै नेपाल एसिया कप छनोटबाट बाहिरियो

काठमाडौँ ।  नेपाली महिला क्रिकेट टोली एसिया कप क्रिकेटका लागि छनोट हुन असफल भएको छ। मलेसियामा जारी एसीसी महिला प्रिमियर कपको क्वाटरफाइनलमा थाइल्यान्डसँग ५६ रनले पराजित भएपछि नेपालको एसिया कप खेल्ने सपना टुटेको हो।

थाइल्यान्डले दिएको १३१ रनको लक्ष्य पछ्याएको नेपालले २० ओभरमा ७ विकेट गुमाएर केवल ७४ रन मात्र बनाउन सक्यो। नेपालका लागि रुबिना क्षेत्रीले सर्वाधिक अविजित २० रन बनाइन् भने अन्य ब्याटरले राम्रो प्रदर्शन गर्न सकेनन्।

यसअघि ब्याटिङ गरेको थाइल्यान्डले २० ओभरमा ४ विकेट गुमाएर १३० रन बनाएको थियो। थाइल्यान्डकी नानापत कोन्चारोन्काइले अविजित ६३ रन बनाइन्।

यसअघि पनि नेपाली महिला टोली एसियन गेम्स छनोटमा चीनसँग हार्दै प्रतियोगिताबाट बाहिरिएको थियो।