मतदाता सूची विवादपछि रास्वपा बागमती अधिवेशनको निर्वाचन स्थगित

काठमाडौँ । राष्ट्रिय स्वतन्त्र पार्टी (रास्वपा) को बागमती प्रदेश अधिवेशनअन्तर्गत भइरहेको निर्वाचन प्रक्रिया तत्कालका लागि रोकिएको छ। मतदाता सूचीको व्यवस्थापनलाई लिएर विवाद बढेपछि निर्वाचन कार्यतालिका अघि नबढाउने निर्णय गरिएको हो।

निर्वाचन समिति संयोजक सुमित्रा पण्डितले सबै निर्वाचन कार्यक्रम हाललाई स्थगित गरिएको जानकारी दिएकी छन्। उनका अनुसार परिस्थिति सामान्य भएपछि २४ घण्टाभित्र नयाँ सूचना जारी गरेर बाँकी प्रक्रिया अघि बढाइनेछ।

निर्वाचन स्थगित भएपछि अधिवेशन स्थल सुनसान जस्तै बनेको छ। सुरक्षाकर्मीको उपस्थितिमा प्रतिनिधिहरूलाई स्थल खाली गराइएको छ। यसअघि समितिले हातले लेखिएको मतदाता नामावली सार्वजनिक गरेको थियो। सो सूचीको विश्वसनीयतामाथि प्रश्न उठेपछि विवाद सुरु भएको थियो। त्यसपछि उम्मेदवारी दर्ता प्रक्रिया अघि बढाइएको भए पनि विवाद समाधान हुन सकेन।

मतदाता सूचीमा असहमति बढेपछि अन्ततः निर्वाचन प्रक्रिया बीचमै रोकिएको हो। अब नयाँ कार्यतालिका निर्वाचन समितिको आगामी सूचनापछि मात्र तय हुनेछ।