प्रकाशित मिति: २०८३ बैशाख १०, बिहिबार (१ महिना अघि)
नेपाल टेलिकमको समर अफर सार्वजनिक: सस्तोमा बढी डाटा र असीमित कल
3,354 Views
काठमाडौं । नेपाल टेलिकमले “समर अफर २०८३” अन्तर्गत नयाँ तथा परिमार्जित भ्वाइस र डाटा प्याकेजहरू सार्वजनिक गरेको छ। ग्राहकको सहजता र आवश्यकतालाई ध्यानमा राख्दै कम्पनीले यसअघि २८ दिनका लागि उपलब्ध गराइँदै आएको प्रिपेड प्याकेजलाई अब ३० दिनको बनाएको जनाएको छ। साथै, भ्वाइस प्याकेजहरूमा सबै सञ्जालमा कल गर्न सकिने सुविधा समावेश गरिएको छ।
नयाँ अफरअन्तर्गत विभिन्न डाटा तथा संयोजन प्याकेजहरूलाई थप आकर्षक बनाइएको छ। विशेषगरी धेरै ग्राहकको रोजाइमा रहेको अनलिमिटेड प्याकमा सुधार गर्दै रु. ९९९ मा सबै सञ्जालमा असीमित कल, ३०० जीबी डाटा र ३०० सन्देश सुविधा उपलब्ध हुनेछ। त्यस्तै रु. ७९९ मा असीमित कल, १५० जीबी डाटा र २५० सन्देश सुविधा प्रदान गरिनेछ।
डाटा प्याकतर्फ रु. ५४९ मा ४० जीबी तथा रु. ९९९ मा १०० जीबी डाटा उपलब्ध हुनेछ भने दैनिक प्रयोगका लागि रु. ५९९ मा २ जीबी प्रतिदिन र रु. ३४९ मा १ जीबी प्रतिदिनको मासिक योजना ल्याइएको छ। यसैगरी सस्तो दरमा छोटो अवधिका अनलिमिटेड भ्वाइस तथा डाटा प्याकसमेत उपलब्ध गराइएको कम्पनीले जनाएको छ।
ग्राहकले आफ्नो मोबाइलबाट *1415# डायल गरेर तथा ‘नेपाल टेलिकम’ एपको प्रयोगबाट विभिन्न प्याकेजहरु सम्बन्धी जानकारी लिन तथा सेवा खरिद गर्न सक्नेछन् ।
उक्त अफर वैशाख ११ देखि लागू हुनेछ। ग्राहकले मोबाइलबाट कोड प्रयोग गरी वा नेपाल टेलिकमको अनुप्रयोगमार्फत सेवा सम्बन्धी जानकारी लिन र खरिद गर्न सक्नेछन्।
