चिया उद्योग संकटमा, सरकार मौन रहेको कांग्रेसको आरोप

काठमाडौँ । नेपाली कांग्रेसका सचेतक निश्कल राईले चिया किसान र उद्योगीहरूको समस्या समाधानमा सरकार उदासीन रहेको आरोप लगाएका छन्। प्रतिनिधि सभामा बोल्दै उनले प्रधानमन्त्री बालेन शाहले यस विषयमा ध्यान नदिएको बताएका हुन्।

उनका अनुसार भारतले चिया निर्यातमा नयाँ मापदण्ड लगाएपछि इलामका चिया उद्योगी र किसान समस्यामा परेका छन्। सोही कारण केही उद्योगहरूले तीन दिनदेखि ताला लगाएर बन्द गरेका छन्। उनले सूर्योदय नगरपालिकामा मात्रै ५० भन्दा बढी र जिल्लाभर ८० भन्दा बढी चिया उद्योग बन्द भएको बताए।

उद्योग बन्द हुँदा किसानले उत्पादन गरेको हरियो चिया खेर गएको, मजदुरहरूको रोजगारी गुमेको र उद्योगीहरू बैंक ऋण तिर्न नसक्ने अवस्थामा पुगेको उनको भनाइ छ।

राईले सरकारसँग चिया निर्यात खुलाउन, दीर्घकालीन समाधान खोज्न, परीक्षण प्रयोगशाला स्थापना गर्न र वैकल्पिक बजार सुनिश्चित गर्न माग गरेका छन्। उनले यो विषय पटक–पटक सदन र सम्बन्धित मन्त्रालयमा उठाइए पनि समाधान नभएको बताए।