निर्वाचन लक्षित हिंसात्मक गतिविधि,शङ्कास्पद वस्तु नियन्त्रण,देशभर १७६जना भन्दा बढी पक्राउ

काठमाडौं । निर्वाचनलाई लक्षित गरी हिंसा र साम्प्रदायिक तनाव फैलाउने उद्देश्यले गतिविधि गरेको आरोपमा पर्साबाट तीन जना व्यक्ति पक्राउ परेका छन्। उनीहरूको साथबाट नौ थान सुतली बम, सुँगुरको टाउको, तारलगायतका सामग्री बरामद गरिएको प्रहरीले जनाएको छ। प्रहरीका अनुसार उनीहरू चुनावी वातावरण बिथोल्ने उद्देश्यले सुँगुरको टाउको मस्जिदमा फ्याँक्ने तयारीमा थिए। समयमै सूचना प्राप्त भएपछि सुरक्षाकर्मीले उनीहरूलाई नियन्त्रणमा लिई सम्भावित ठूलो घटना हुनबाट रोकेको हो।

यसैबीच, उदयपुरको चौदण्डीगढी नगरपालिका–२ लाटीखोला क्षेत्रमा मदन भण्डारी सडकमार्ग नजिक शङ्कास्पद वस्तु फेला परेपछि सुरक्षाकर्मीले तत्काल नियन्त्रणमा लिएर नष्ट गरेका छन्। जिल्ला प्रहरी कार्यालयका अनुसार मंगलबार साँझ विस्फोटक पदार्थजस्तो देखिने वस्तु सडकमा देखिएपछि नेपाली सेना, नेपाल प्रहरी र सशस्त्र प्रहरीको संयुक्त टोली घटनास्थल पुगेको थियो। परीक्षणका क्रममा उक्त वस्तु वास्तविक विस्फोटक नभएको पुष्टि गरिएको छ।

उता, निर्वाचन विरोधी गतिविधिमा संलग्न रहेको आरोपमा देशभरबाट १७६ जनालाई पक्राउ गरिएको प्रहरीले जनाएको छ। प्रहरी प्रधान कार्यालयका अनुसार गलत सूचना प्रवाह गर्ने, सवारी साधनमा आगजनी गर्ने तथा निर्वाचन प्रक्रिया अवरुद्ध गर्न खोज्ने गतिविधिमा संलग्न व्यक्तिहरूलाई नियन्त्रणमा लिइएको हो। सुरक्षाको अवस्था समग्रमा सन्तोषजनक रहेको र राजधानीमा केही सवारी साधन जलाउने घटना बाहेक गम्भीर प्रकृतिका अन्य घटना नभएको प्रहरीले जनाएको छ।

प्रहरीले सबै मतदानस्थलमा सुरक्षाकर्मी परिचालन भइसकेको जानकारी दिँदै मौन अवधिमा सामाजिक सञ्जालको दुरुपयोग, अफवाह फैलाउने र आचारसंहिता उल्लङ्घन गर्ने गतिविधिमाथि कडा निगरानी जारी रहेको बताएको छ। केन्द्रदेखि स्थानीय तहसम्म सुरक्षा संयन्त्र उच्च सतर्कताका साथ परिचालित रहेको प्रहरीले स्पष्ट पारेको छ।