प्रतिनिधि सभा निर्वाचन २०८२: सुरक्षा रणनीति सुदृढीकरणमा सरोकारवालाबीच छलफल

काठमाडौं । प्रतिनिधि सभा सदस्य निर्वाचन २०८२ लाई लक्षित गरी सुरक्षा व्यवस्थापन तथा सुदृढीकरणका विषयमा केन्द्रित अन्तरक्रिया कार्यक्रम बुधबार नेपाल प्रहरी प्रधान कार्यालयमा सम्पन्न भएको छ। प्रहरी महानिरीक्षक दान बहादुर कार्कीको समुपस्थितिमा सम्पन्न कार्यक्रममा निर्वाचनलाई स्वच्छ, निष्पक्ष र भयरहित वातावरणमा सम्पन्न गराउने उद्देश्यका साथ सरोकारवाला निकायबीच समन्वय, सहकार्य र रणनीतिक तयारीका विषयमा गहन छलफल गरिएको थियो।

कार्यक्रममा पूर्व प्रमुख निर्वाचन आयुक्त भोजराज पोखरेलले निर्वाचनका क्रममा देखा पर्न सक्ने सम्भावित चुनौतीहरू पहिचान गर्दै उपलब्ध साधन–स्रोतको उच्चतम प्रयोग गर्नुपर्नेमा जोड दिनुभयो। उहाँले निर्वाचन सुरक्षाका लागि सूचना संकलन तथा विश्लेषणलाई प्राथमिकतामा राखी तर्जुमा गरिएका सुरक्षा रणनीति र कार्ययोजनालाई प्रभावकारी रूपमा कार्यान्वयन गर्नुपर्ने आवश्यकता औँल्याउनुभयो। विगतमा सम्पन्न निर्वाचनका सुरक्षा व्यवस्थापनको विश्लेषणका आधारमा आगामी निर्वाचनमा अझ परिष्कृत र परिणाममुखी रणनीति अवलम्बन गर्नुपर्ने उहाँको भनाइ थियो।

प्रहरी महानिरीक्षक कार्कीले निर्वाचन सुरक्षालाई साझा दायित्वको विषयका रूपमा व्याख्या गर्दै सरोकारवाला सबै पक्षले सुरक्षा संवेदनशीलता अनुसार समन्वयात्मक ढंगले कार्यसम्पादन गर्नुपर्ने बताउनुभयो। उहाँले अन्तरक्रियाबाट प्राप्त सुझाव, प्रतिक्रिया र पृष्ठपोषणले निर्वाचन सुरक्षालाई थप सुदृढ र प्रभावकारी बनाउने विश्वास व्यक्त गर्नुभयो। विगत निर्वाचनका क्रममा देखिएका कमजोरी र त्रुटीहरूको समीक्षा गर्दै यसपटक निर्वाचनपूर्व, निर्वाचन अवधिभर र निर्वाचनपछिका सबै चरणमा चुनौती सम्बोधन गर्न प्रहरी परिचालन र रणनीति परिष्कृत गरिएको जानकारी दिनुभयो।

प्रहरी महानिरीक्षक कार्कीले निर्वाचनको समयमा हुनसक्ने अवाञ्छित गतिविधि, सामाजिक सञ्जालमार्फत फैलिन सक्ने भ्रामक तथा निर्वाचन विरोधी क्रियाकलापलाई नियन्त्रण गर्न प्रहरी थप सक्रिय रूपमा परिचालित भइरहेको उल्लेख गर्नुभयो। कानुन विपरीत गतिविधिमा संलग्न जो–कोहीलाई कानुनी दायरामा ल्याइने स्पष्ट सन्देश पनि उहाँले दिनुभयो।

कार्यक्रममा गृह मन्त्रालयका प्रवक्ता तथा सुरक्षा तथा समन्वय महाशाखाका सहसचिव आनन्द काफ्लेले निर्वाचनका क्रममा उत्पन्न हुन सक्ने जोखिम र चुनौतीहरूको सूक्ष्म विश्लेषण आवश्यक रहेको बताउनुभयो। नेपाल प्रहरीले अवलम्बन गरेको सुरक्षा रणनीति प्रशंसनीय रहेको उल्लेख गर्दै मन्त्रालय आवश्यक स्रोतसाधन उपलब्ध गराउन सदैव सक्रिय रहने प्रतिबद्धता व्यक्त गर्नुभयो।

यस अवसरमा नेपाल प्रहरी प्रधान कार्यालय कार्य विभागका प्रहरी वरिष्ठ उपरीक्षक सुवास चन्द्र बोहोराले निर्वाचन सुरक्षा तयारी, आगामी रणनीति, जनशक्ति तथा भौतिक स्रोतसाधन व्यवस्थापन, सुरक्षा चुनौती र जोखिम विश्लेषणसम्बन्धी विस्तृत प्रस्तुतीकरण गर्नुभएको थियो। कार्यक्रममा अवकाश प्राप्त प्रहरी महानिरीक्षक, अतिरिक्त महानिरीक्षक, नायव महानिरीक्षक तथा वरिष्ठ प्रहरी अधिकृतहरूको उल्लेख्य सहभागिता रहेको थियो।

आसन्न प्रतिनिधि सभा निर्वाचन २०८२ लाई लक्षित गरी नेपाल प्रहरीले अघि बढाइरहेको सुरक्षा तयारीको सन्दर्भमा विगत निर्वाचनमा सक्रिय भूमिका निर्वाह गरेका दिग्गज व्यक्तित्व र पूर्व वरिष्ठ प्रहरी अधिकृतहरूको अनुभव तथा व्यवहारिक ज्ञानलाई संस्थागत रूपमा समेट्ने उद्देश्यले उक्त अन्तरक्रिया आयोजना गरिएको हो। यसबाट प्राप्त रणनीतिक सुझाव र अनुभवले निर्वाचन सुरक्षालाई अझ प्रभावकारी, सुदृढ र परिणाममुखी बनाउने अपेक्षा गरिएको छ।