नेपाल–भारत सीमामा सुरक्षाकर्मीको संयुक्त अनुगमन

सर्लाही। सर्लाहीस्थित नेपाल–भारत सीमा क्षेत्रमा दुवै देशका सुरक्षाकर्मीले संयुक्त सुरक्षा गस्ती सञ्चालन गरेका छन्। शनिबार दिउँसो करिब १२ बजेदेखि सुरु भएको गस्ती इलाका प्रहरी कार्यालय संग्रामपुर, सशस्त्र प्रहरी बल र भारतीय सशस्त्र सीमा बल (एसएसबी) को संयुक्त सहभागितामा गरिएको हो।

गस्ती इलाका प्रहरी कार्यालय संग्रामपुरबाट प्रहरी वरिष्ठ नायब निरीक्षक सुशिल रावलको कमाण्डमा ४ जना, सशस्त्र प्रहरी बल नेपाल बिओपी संग्रामपुरबाट नायब निरीक्षक प्रदीप पनेरुको कमाण्डमा ७ जना तथा भारतीय सशस्त्र सीमा बल ५१ बटालियन ढाकाबाट इन्सपेक्टर राहुल सिंहको कमाण्डमा ५ जना गरी कुल १६ जना सुरक्षाकर्मी सहभागी थिए।

जिल्ला प्रहरी कार्यालय सर्लाहीका अनुसार संयुक्त टोलीले नेपाल–भारत सीमामा पर्ने पिलर नम्बर ३१७/३ देखि पिलर नम्बर ३१८/२३ सम्मको क्षेत्रमा गस्ती गर्दै सीमा सुरक्षाको अवस्था, आवतजावतको गतिविधि तथा सम्भावित अवैध क्रियाकलापको अनुगमन गरेको हो। सीमा क्षेत्रमा शान्ति, सुरक्षा र आपसी समन्वय सुदृढ गर्ने उद्देश्यले यस्ता संयुक्त गस्ती नियमित रूपमा सञ्चालन हुँदै आएको जिल्ला प्रहरी कार्यालयले जनाएको छ।