क्लिंकर मौज्दात हेरफेर प्रकरणमा पुनर्बिमा कम्पनीका अध्यक्ष पौडेलसहित ८ जनाविरुद्ध भ्रष्टाचार मुद्दा

काठमाडौँ । अख्तियार दुरुपयोग अनुसन्धान आयोगले नेपाल पुनर्बिमा कम्पनीका अध्यक्ष सुरेन्द्रकुमार पौडेलसहित आठ जनाविरुद्ध भ्रष्टाचार मुद्दा दायर गरेको छ। उदयपुर सिमेन्ट उद्योगमा महाप्रबन्धकका रूपमा कार्यरत रहँदा सार्वजनिक पदको दुरुपयोग गरी सरकारी सम्पत्तिमा हिनामिना गरेको आरोपमा आयोगले आइतबार विशेष अदालतमा मुद्दा दायर गरेको हो।

आयोगले पौडेलविरुद्ध १२ करोड ४७ लाख २२ हजार २४२ रुपैयाँ ११ पैसा बिगो कायम गर्दै सोहीअनुसार जरिवाना, कैद सजाय र बिगो असुल उपर मागदाबी गरेको छ। पौडेलसहित तत्कालीन निमित्त महाप्रबन्धक नवलकिशोर साह, नायब महाप्रबन्धक महेशप्रसाद काफ्ले, उत्पादन महाशाखा प्रमुख सञ्जयकुमार लाल, भण्डार महाशाखा प्रमुख महेशप्रसाद काफ्ले, उत्पादन विभाग प्रमुख रविचन्द्र पौडेल, सिमेन्ट उत्पादन महाशाखाका हरिप्रसाद अधिकारी र बिक्री विभाग प्रमुख रामबहादुर बीसी प्रतिवादी छन्।

अख्तियारका अनुसार प्रतिवादीहरूले क्लिंकरको मासिक तथा वार्षिक मौज्दात अभिलेखमा हेरफेर गरेको, भौतिक परीक्षण तथा लेखापरीक्षण प्रतिवेदनलाई बेवास्ता गरेको र त्यसबाट सरकारी सम्पत्तिमा क्षति पुर्‍याएको ठहर गरिएको छ। उल्लेखनीय छ, पौडेललाई २० भदौ २०८२ मा तत्कालीन अर्थमन्त्री विष्णु पौडेलले चार वर्षका लागि नेपाल पुनर्बिमा कम्पनीको अध्यक्षमा नियुक्त गरेका थिए।