निर्वाचन आचारसंहिताका कारण महासंघको २६औँ साधारण सभा तथा १३औँ महाधिवेशन स्थगित

काठमाडौं । नेपाल निर्माण व्यवसायी महासंघको २६औँ साधारण सभा तथा १३औँ महाधिवेशन स्थगित गरिएको छ। प्रतिनिधिसभा निर्वाचनको आचारसंहिता लागू भइसकेकाले निर्वाचन आयोगको निर्देशनअनुसार माघ १५ देखि १७ गतेसम्मका लागि तय गरिएको महाधिवेशन रोकिएको महासंघले जनाएको हो।

महासंघको स्थायी समितिको बैठकले अर्को सूचना जारी नहुन्जेलसम्म निर्वाचनसम्बन्धी सम्पूर्ण कार्यक्रम स्थगित गर्ने निर्णय गरेको छ। आचारसंहिताको पालना गर्नु सबै सरोकारवाला संस्थाको दायित्व भएकाले आयोगको निर्देशनअनुसार कार्यक्रम रोक्नु परेको महासंघको भनाइ छ।

महासंघका महासचिव रोशन दाहालका अनुसार निर्वाचन आचारसंहिता हटेपछि कम्तीमा १५ दिनको पूर्वसूचना दिएर साधारण सभा तथा महाधिवेशनको नयाँ मिति सार्वजनिक गरिनेछ। उनले हालसम्म छनोट भइसकेका प्रतिनिधिहरू नै आगामी महाधिवेशनमा सहभागी हुन पाउने स्पष्ट पारे।

यो व्यवस्था महासंघअन्तर्गत रहेका प्रदेश, जिल्ला तथा वस्तुगत संघ–संस्थाहरूमा समेत समान रूपमा लागू हुने महासंघले जनाएको छ।