वीरगञ्जमा कर्फ्यु दिउँसो १ बजेसम्म लम्बियो

२२ पुस, वीरगञ्ज। वीरगञ्जमा जारी कर्फ्यु दिउँसो १ बजेसम्मका लागि थप गरिएको छ । धार्मिक तथा सामाजिक विषयलाई लिएर दुई समुदायबीच तनाव चर्किँदै गएपछि स्थानीय प्रशासनले कर्फ्यु आदेश जारी गरेको हो ।

जिल्ला प्रशासन कार्यालय पर्साका अनुसार सोमबार साँझ ६ बजेदेखि आज बिहान ८ बजेसम्म लागू गरिएको कर्फ्यु अवस्था मूल्याङ्कनपछि दिउँसो १ बजेसम्म लम्ब्याइएको हो । प्रशासनले शान्ति–सुरक्षा कायम गर्न कर्फ्यु आवश्यक भएको जनाएको छ ।

प्रमुख जिल्ला अधिकारी भोला दाहालका अनुसार वीरगञ्ज महानगरपालिका क्षेत्रभित्र पूर्वतर्फ बसपार्क, नगवा र इनर्वा, पश्चिमतर्फ सिर्सिया नदी, उत्तरतर्फ गण्डक चोक र दक्षिणतर्फ शंकराचार्य गेटसम्म कुनै पनि प्रकारका भेला, सभा, जुलुस तथा प्रदर्शन पूर्ण रूपमा निषेध गरिएको छ ।

कर्फ्यु अवधिमा अत्यावश्यक कामबाहेक घरबाहिर ननिस्किन प्रशासनले आग्रह गरेको छ । अपरिहार्य अवस्थामा निस्कनुपरेमा नजिकको सुरक्षाकर्मीको समन्वयमा वा १०० नम्बरमा सम्पर्क गरेर मात्र बाहिर निस्कन अनुरोध गरिएको छ ।

कर्फ्यु आदेश लागू रहँदा एम्बुलेन्स, दमकल, शववाहन, स्वास्थ्यकर्मीका सवारी साधन, सञ्चारकर्मी, पर्यटक सवारी, मानवअधिकारकर्मी, कूटनीतिक नियोगका सवारी साधन तथा हवाई टिकटका आधारमा यात्रा गर्ने यात्रुहरूको आवागमनलाई सुरक्षाकर्मीले सहजीकरण गर्ने प्रशासनले जनाएको छ । आइतबारदेखि जारी प्रदर्शनका कारण वीरगञ्जमा स्थिति क्रमशः अशान्त बन्दै गएको प्रशासनको भनाइ छ ।