नेपाली टेलिकमद्वारा ७४९ स्थानीय तहमा 4G सेवा, कर्णालीमा नयाँ विस्तार

काठमाडौं । नेपाल टेलिकमले कर्णाली प्रदेशका दुर्गम तथा अति विकट क्षेत्रमा दूरसञ्चार पहुँच विस्तार गर्दै 2G र 4G सेवा सञ्चालनमा ल्याएको छ। सरकारी नीतिअनुसार ग्रामीण तहसम्म सञ्चार सेवा पुर्‍याउने लक्ष्यसहित कम्पनीले हालै हुम्ला, दैलेख, जाजरकोट र डोल्पाका कठिन भूभागमा नयाँ प्रविधियुक्त सेवा सुरु गरेको हो।

हुम्ला जिल्लाको सर्केगाड–३ र सर्केगाड–६ मा 2G तथा 4G सेवा सञ्चालनमा आएपछि सर्केगाड गाउँपालिकाका वडा नं. २, ३, ४ र ६ का बस्तीहरू पहिलो पटक उच्च गुणस्तरीय मोबाइल सेवामा जोडिएका छन्। उनलेपाली, स्यालटाडी, बराई गाउँ, ठुलाचौर, साधेकाट, रिपा, सर्केदेउलगायतका क्षेत्रमा सञ्चार पहुँच वृद्धि भएको छ।
यस्तै, अदानचुली–६ मा समेत 2G/4G सेवा सञ्चालनमा आएपछि अदानचुली गाउँपालिकाका वडा नं. २, ३, ४, ५ र ६ का पानचौर, कालिकालगायतका बस्ती लाभान्वित भएका छन्।

दैलेखको गुराँस गाउँपालिकाको पर्यटकीय क्षेत्र गुराँसमा 4G सेवा सुरु भएसँगै वडा नं. ३, ४ र ५ का गुराँस बजार, गाउँपालिका कार्यालय क्षेत्र, गोगनपानी, पातीकान्ला, बयलकाँडा र लेकगाउँका बासिन्दा पहिलो पटक उच्च गति मोबाइल इन्टरनेटमा जोडिएका छन्।

जाजरकोटको जुनीचाँदे गाउँपालिकाको कोत्राङमा 2G/4G सेवा सुरु भएसँगै वडा नं. ७, ८, ९, १० र ११ का बस्तीहरू सेवामा समेटिएका छन्।
त्यसैगरी, डोल्पाको ठूलीभेरी नगरपालिका र शे–फोक्सुन्डो गाउँपालिकाका मिदरती लेक क्षेत्रमा फोरजी टावर सञ्चालनमा आएपछि फोक्सुन्डो ट्रेल, यार्सा पाटन, छेप्का, भोक्पा, सागबारीलगायतका आधा दर्जन बस्तीहरू सञ्चार जडानमा आएका छन्। राष्ट्रिय निकुञ्ज कार्यालय र सैनिक ब्यारेक क्षेत्र पनि सेवा दायरामा समावेश भएका छन्।

टेलिकमका अनुसार, हालसम्म ७५३ मध्ये ७४९ स्थानीय तहमा 4G सेवा पुगेको छ। कठिन भूभाग र कम प्रतिफल हुने स्थानमा समेत समान रूपमा सेवा विस्तार गर्ने कम्पनीको नीति अन्तर्गत कर्णालीका दर्जनौँ बस्तीमा आधुनिक दूरसञ्चार प्रविधिको पहुँच कायम गरिएको जनाइएको छ।