सर्वोच्च र जिल्ला अदालतको प्रहरीमा जाहेरी

काठमाडौँ। हालैको जेन-जी आन्दोलन का क्रममा भएको तोडफोड, आगजनी र लुटपाटका घटनाबारे सर्वोच्च अदालत र काठमाडौं जिल्ला अदालतले प्रहरीमा औपचारिक जाहेरी दिएका छन्। दुवै अदालतको तर्फबाट जाहेरी जिल्ला प्रहरी परिसर भद्रकालीमा दर्ता गरिएको हो।

काठमाडौं प्रहरीका प्रवक्ता एसपी पवन भट्टराईका अनुसार अदालतहरूले आन्दोलनको क्रममा अदालत भवनमा भएको क्षतिको विस्तृत विवरणसहित संलग्नहरूलाई कानूनी कारबाहीको माग गर्दै जाहेरी दिएका हुन्। उनले भने, “२४ गतेको घटनासँग सम्बन्धित सम्पूर्ण प्रमाण र क्षतिको विवरण जाहेरीमा समावेश गरिएको छ।”

जेन-जी आन्दोलनका क्रममा सर्वोच्चलगायत देशका विभिन्न अदालत भवनहरूमा तोडफोड, आगजनी र लुटपाटका घटना भएको प्रहरीले जनाएको छ। सो क्रममा मुद्दासम्बन्धी अभिलेख, ऐतिहासिक कागजात तथा अन्य महत्वपूर्ण फाइलहरूमा क्षति पुगेको बताइएको छ।

अदालत प्रशासनका अनुसार, केही अभिलेखहरू जलाइएका छन् भने कम्प्युटर र उपकरणहरूसमेत नष्ट भएका छन्। सर्वोच्च अदालतले घटनालाई न्यायिक स्वतन्त्रतामाथिको प्रत्यक्ष आक्रमणको रूपमा लिँदै संलग्न व्यक्तिहरूलाई शीघ्र पहिचान गरी कानूनी दायरामा ल्याउन माग गरेको छ।

यसैबीच, प्रहरी प्रशासनले जाहेरीका आधारमा अनुसन्धान अघि बढाएको जनाएको छ। घटनासँग सम्बन्धित सिसीटीभी फुटेज संकलन र प्रत्यक्षदर्शीका बयान लिने कार्य तीव्र रूपमा भइरहेको बताइएको छ।