राष्ट्रपति पौडेल कतार प्रस्थान

काठमाडौँ । राष्ट्रपति रामचन्द्र पौडेल आज बिहान नेपाली प्रतिनिधिमण्डलको नेतृत्व गर्दै कतारको राजधानी दोहामा यही कात्तिक १८ देखि २० गतेसम्म हुने ‘सामाजिक विकासका लागि दोस्रो विश्व शिखर सम्मेलन’मा सहभागी हुन प्रस्थान गर्नुभएको छ। उहाँ कतारका अमिर शेख तमिम बिन हमद अल थानीको निमन्त्रणमा सो सम्मेलनमा सहभागी हुनुभएको हो। त्रिभुवन अन्तर्राष्ट्रिय विमानस्थलमा उपराष्ट्रपति रामसहायप्रसाद यादव, प्रधानमन्त्री सुशीला कार्की, गृहमन्त्री ओमप्रकाश अर्याल, कतारका राजदूत र उच्च अधिकारीहरूले उहाँलाई विदाई गरेका थिए। नेपाली सेनाको एक टुकडीले सलामी अर्पण गरेको थियो।

राष्ट्रपति पौडेलले कात्तिक १८ गते सम्मेलनको मुख्य सत्रमा सम्बोधन गर्ने र कतारका अमिर तथा संयुक्त राष्ट्रसंघका महासचिव एन्टोनियो गुटेरेससँग भेटवार्ता गर्ने कार्यक्रम छ। सन् १९९५ मा डेनमार्कको कोपनहेगनमा पहिलो सम्मेलन भएको यो शिखर बैठकमा विकास असमानता, जनसङ्ख्या असन्तुलन र प्रविधिको प्रभावजस्ता विषयमा छलफल हुनेछ। राष्ट्रपति पौडेल कात्तिक २० गते स्वदेश फर्किनेछन्।