कोरला नाका हुँदै चीन व्यापार विस्तार, पहिलो त्रैमासमै ५ अर्बभन्दा बढी कारोबार

काठमाडौँ । नेपाल र चीनबीचको व्यापारिक आवागमनमा नयाँ मोड आएको छ। रसुवागढी र तातोपानी नाकामा पहिरो र बाढीका कारण व्यापार अवरुद्ध भएपछि मुस्ताङस्थित कोरला नाका वैकल्पिक व्यापारिक मार्गका रूपमा तीव्र गतिमा अघि बढिरहेको छ।

भन्सार विभागका अनुसार, चालु आर्थिक वर्ष २०८२/८३ को पहिलो त्रैमासमा कोरला नाका हुँदै ५ अर्ब रुपैयाँभन्दा बढीको व्यापार भएको छ। यस अवधिमा चीनबाट ५ अर्ब २७ करोड रुपैयाँ बराबरको वस्तु आयात भएको छ भने ९१ लाख ३२ हजार रुपैयाँ बराबरका वस्तु चीनतर्फ निर्यात भएका छन्।

यो नाका हुँदै विद्युतीय सवारीसाधन (EV), लत्ताकपडा, फलफूल लगायतका वस्तुको आयात उल्लेखनीय रूपमा बढेको विभागले जनाएको छ। ३० भदौदेखि पूर्णरूपमा सञ्चालनमा आएको यो नाकाले छोटो अवधिमै प्रभावकारी कारोबार देखाएको छ।

यसअघि २४ असारमा रसुवागढी नाका अवस्थित लेहेन्दे खोलामा आएको बाढीले रसुवा भन्सार कार्यालय पूर्ण रूपमा बन्द भएको थियो भने तातोपानी नाकामा पनि कोदारी राजमार्गमा आएको पहिरोले यातायात अवरुद्ध बनाएको थियो। त्यसपछि चीन र नेपालबीच वैकल्पिक नाकाका रूपमा कोरला नाकालाई सञ्चालनमा ल्याइएको हो।

नेपाल राष्ट्र बैंकले पनि कोरला (मुस्ताङ) भन्सार कार्यालयमार्फत चिनियाँ भूभाग हुँदै प्रतीतपत्र (Letter of Credit) प्रणालीमा आयात गर्न सहजीकरण गरेको छ। विभागीय तथ्यांकअनुसार, पछिल्ला तीन महिनामा रसुवागढी नाकाबाट ३८ करोड ८१ लाख रुपैयाँ बराबरको मात्र वस्तु आयात भएको छ भने निर्यात शून्य रहेको छ।

तातोपानी नाकाबाट भने निर्यात नभए पनि ९ अर्ब ४४ करोड रुपैयाँ बराबरको वस्तु आयात भएको देखिन्छ। समग्र रूपमा चीनसँगको व्यापारमा नेपालले १ खर्ब ४ अर्ब ८९ करोड रुपैयाँ बराबरको वस्तु आयात र १८ करोड ६४ लाख रुपैयाँ बराबरको वस्तु निर्यात गरेको छ।