माबिलुङ्ग इनर्जीको आईपीओ सर्वसाधारणको लागि आजदेखि खुला

काठमाडौं । माबिलुङ्ग इनर्जी लिमिटेडले आज साउन २६ गतेदेखि सर्वसाधारणका लागि आईपीओ निष्काशन गरेको छ। यसअघि आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीका लागि आईपीओ जारी भइसकेको थियो।

कम्पनीको जारी पूँजी ३८ करोड ५८ लाख २४ हजार रुपैयाँमध्ये ४८.९९९८ प्रतिशत अर्थात १८ लाख ९० हजार ५३० कित्ता शेयर निष्काशनको अनुमति पाएको थियो। पहिलो चरणमा ३ लाख ८५ हजार ८२४ कित्ता शेयर स्थानीयका लागि र १ लाख ५० हजार ४७१ कित्ता विदेशमा कार्यरत नेपालीका लागि बिक्री भइसकेको छ।

दोस्रो चरणमा १३ लाख ५४ हजार २३५ कित्ता शेयर निष्काशन भइरहेको छ। यसमध्ये ३० हजार ९५ कित्ता कर्मचारीका लागि, ७५ हजार २३६ कित्ता सामूहिक लगानी कोषका लागि छुट्याइएको छ भने बाँकी १२ लाख ४८ हजार ९०४ कित्ता सर्वसाधारणका लागि खुला गरिएको हो।

लगानीकर्ताले न्यूनतम १० कित्ता र अधिकतम ५० हजार कित्तासम्म आवेदन दिन सक्नेछन्। आवेदन अवधि साउन २९ गतेसम्म रहनेछ।

यस आईपीओको निष्काशन तथा बिक्री प्रबन्धक लक्ष्मी सनराइज क्यापिटल लिमिटेड हो। आवेदन नेपाल धितोपत्र बोर्डबाट स्वीकृत सि आस्बा सदस्य बैंक तथा वित्तीय संस्थाहरूका शाखा कार्यालय वा सि आस्बा प्रणालीमार्फत दिन सकिनेछ।