ग्रे लिस्टबाट हटाउने उपायसहित बैंकिङ क्षेत्र सुधारमा सुझाव मागियो

काठमाडौं । बैंकिङ प्रणालीमा सुधार ल्याउन नेपाल राष्ट्र बैंकले सरोकारवालाहरूबाट औपचारिक सुझाव माग गरेको छ। बैंकिङ क्षेत्र सुधार सुझाव कार्यदल (FSRRT) मार्फत प्राप्त हुने सुझावहरूलाई संकलन गरी सम्वन्धित विषयमा नीतिगत तथा कार्यान्वयन तहमा पहल गर्ने तयारी गरिएको हो।

राष्ट्र बैंकका अनुसार इच्छुक व्यक्ति तथा संस्थाहरूले २०८१ असार ११ गतेसम्म कार्यदलको इमेल ठेगाना [email protected] मा आफ्ना सुझाव पठाउन सक्नेछन्।

कार्यदलको उद्देश्य बैंकिङ प्रणालीमा सुधारसंगै समावेशी, उत्तरदायी र दिगो वित्तीय वातावरण निर्माण गर्नु रहेको छ। विशेष गरी निम्न विषयहरूमा केन्द्रित भएर सुझाव माग गरिएको छ:

मुख्य सुझाव क्षेत्रहरू:

१. बैंकिङ नीति तथा नियमन सुधार: जोखिममा आधारित प्रभावकारी सुपरीवेक्षण र ग्राहकमैत्री सेवा विकास।
२. आर्थिक गतिविधिमा बैंकको पूर्ण संलग्नता: उत्पादनशील क्षेत्रमा बैंकको भूमिका सुदृढ पार्ने उपायहरू।
३. ग्रामीण कर्जा प्रवाह विस्तार: वित्तीय पहुँच अभाव भएका क्षेत्रमा कर्जाको पहुँच प्रभावकारी बनाउन उपायहरू।
४. वित्तीय संस्थाहरूको गाभ्ने/प्राप्त गर्ने प्रक्रियामा सुधार: मर्जर र पोस्ट-मर्जर समस्याको पहिचान र समाधान।
५. नेपाललाई ग्रे लिस्टबाट हटाउने उपाय: अन्तर्राष्ट्रिय नियामक मापदण्ड अनुसार सुधारात्मक भूमिका।
६. पुँजीबजार विकासमा राष्ट्र बैंकको समन्वयात्मक भूमिका: समृद्ध वित्तीय प्रणालीका लागि रणनीति तय गर्ने।