नेपाल टेलिकमको निमित्त प्रबन्ध निर्देशकमा सबिना मास्के नियुक्त

काठमाडौँ । नेपाल दूरसञ्चार कम्पनी लिमिटेड (नेपाल टेलिकम) को निमित्त प्रबन्ध निर्देशकमा सबिना मास्के नियुक्त भएकी छन्। सञ्चार तथा सूचना प्रविधि मन्त्रालयको मिति २०८२ जेठ २७ गतेको सम्माननीय मन्त्रीस्तरको निर्णयअनुसार उनलाई नियुक्त गरिएको हो।

मन्त्रालयको निर्णयका आधारमा च.नं. संस्थान/३१७८ अनुसार जारी नियुक्ति पत्रमार्फत मास्केलाई नेपाल टेलिकमको निमित्त प्रबन्ध निर्देशकको जिम्मेवारी दिइएको हो। उनले २०८२ जेठ २८ गतेदेखि औपचारिक रूपमा पदभार ग्रहण गरेकी छन्।

यसअघि मास्के टेलिकमको नायब प्रबन्ध निर्देशकका रूपमा प्रमुख प्राविधिक अधिकृत (CTO) को भूमिकामा कार्यरत थिइन्।

सबिना मास्केले चीनको डालियान मेरीटाइम युनिभर्सिटीबाट बी.ई. (इञ्जिनियरिङ) अध्ययन गरेकी हुन्। उनले नेपाल टेलिकम (तत्कालीन नेपाल दूरसञ्चार संस्थान) मा माघ २५, २०४९ मा अस्थायी इञ्जिनियरको रूपमा सेवा प्रारम्भ गरेकी थिइन्। फागुन १०, २०५१ मा उनले स्थायी नियुक्ति प्राप्त गरेकी हुन्।

पदीय अनुभव र प्राविधिक दक्षता भएका मास्के २०७८ माघ १८ गतेदेखि कम्पनीको नायब प्रबन्ध निर्देशकको रूपमा कार्यरत रहँदै आएकी थिइन्।

पदभार ग्रहण समारोहमा बोल्दै मास्केले विषम परिस्थितिमा आफूलाई नेपाल सरकार तथा मन्त्रालयबाट प्रदान गरिएको जिम्मेवारीप्रति आभार व्यक्त गर्दै सबैको साथ र सहयोगमा कम्पनीको प्रगतिमा योगदान दिने प्रतिबद्धता व्यक्त गरिन्।

‘म मेरो जिम्मेवारी इमान्दारिताका साथ निर्वाह गर्दै, कम्पनीको निरन्तर सुधार र डिजिटल भविष्यतर्फको यात्रालाई अझ प्रभावकारी बनाउने प्रयासमा लाग्नेछु,’ मास्केले भनिन्।

नेपाल टेलिकमका प्रवक्ता रबिन्द्र मानन्धरका अनुसार, नयाँ नेतृत्वले कम्पनीको प्राविधिक सुधार र संस्थागत मजबूतीका क्षेत्रमा महत्वपूर्ण योगदान दिने अपेक्षा गरिएको छ।