वाणिज्य बैंकहरूको १४७० अर्ब र अन्य वित्तीय संस्थाको १४९ अर्ब अन्तरबैंक कारोबार

काठमाडौँ। आर्थिक वर्ष २०८१/८२ को पहिलो १० महिनामा कुल १६२० अर्ब ५४ करोड रुपैयाँ बराबरको अन्तरबैंक कारोबार भएको छ। नेपाल राष्ट्र बैंकले सार्वजनिक गरेको तथ्यांकअनुसार वाणिज्य बैंकहरू तथा अन्य वित्तीय संस्थाहरूबीच यो कारोबार भएको हो।

समीक्षा अवधिमा वाणिज्य बैंकहरूबीच मात्रै १४७० अर्ब ८६ करोड रुपैयाँको कारोबार भएको छ। त्यस्तै, वाणिज्य बैंकहरू बाहेकका अन्य वित्तीय संस्थाहरूबीच १४९ अर्ब ६८ करोड रुपैयाँ बराबरको अन्तरबैंक कारोबार भएको छ।

गत वर्षको सोही अवधिमा भने अन्तरबैंक कारोबार उच्च स्तरमा थियो। आर्थिक वर्ष २०८०/८१ को पहिलो १० महिनामा वाणिज्य बैंकहरूबीच ३४७७ अर्ब ४ करोड र अन्य वित्तीय संस्थाहरूबीच ३४४ अर्ब ५ करोड रुपैयाँको कारोबार भएको थियो। सो अवधिमा कुल कारोबार ३८२१ अर्ब ९ करोड रुपैयाँ पुगेको थियो।

हालको अन्तरबैंक कारोबार गत वर्षको तुलनामा उल्लेख्य रूपमा घटेको देखिएको छ। अर्थशास्त्रीहरूका अनुसार तरलता स्थितिमा आएको सुधार, मौद्रिक नीतिको प्रभाव र बजारको मौजुदा प्रवृत्तिका कारण अन्तरबैंक कारोबारमा यस्तो गिरावट आएको हो।