संघीय संसद्को दुवै सदनको बैठक बस्दै

काठमाडौँ, जेठ २० – आज मङ्गलबार संघीय संसद्को दुवै सदन—प्रतिनिधिसभा र राष्ट्रियसभाको बैठक बस्ने भएको छ। प्रतिनिधिसभाको बैठक बिहान ११ बजे र राष्ट्रियसभाको बैठक दिउँसो १:१५ बजेका लागि बोलाइएको छ।

प्रतिनिधिसभा बैठकमा उपप्रधानमन्त्री तथा अर्थमन्त्री विष्णुप्रसाद पौडेलले “आगामी आर्थिक वर्ष २०८२/८३ को राजस्व र व्ययको वार्षिक अनुमानमाथि सामान्य छलफल गरियोस्” भन्ने प्रस्ताव पेस गर्ने कार्यसूची रहेको छ। सो प्रस्तावमाथि आजै छलफल हुने सम्भावना छ।

त्यस्तै, राज्यव्यवस्था तथा सुशासन समितिका सभापति रामहरि खतिवडाले “संघीय निजामती सेवा विधेयकसम्बन्धी समितिको प्रतिवेदन, २०८२” प्रतिनिधिसभामा पेस गर्ने कार्यक्रम छ।

राष्ट्रियसभाको बैठकमा अर्थमन्त्री पौडेलले प्रतिनिधिसभाबाट सन्देशसहित प्राप्त “भन्सार विधेयक, २०८०” माथि विचार गरियोस् भन्ने प्रस्ताव प्रस्तुत गर्नेछन्।