एनएमबि बैंकको सहकार्यमा दुई जलविद्युत् आयोजनामा प्रगति

काठमाडौंँ ।बज्र एनर्जी भेन्चर्स प्रा.लि. र भिजन लुम्बिनीको प्रवर्द्धनमा कास्की जिल्लामा निर्माणाधीन दुई जलविद्युत् आयोजना सम्बन्धी दुई प्रमुख कार्यक्रमहरू काठमाडौंमा सम्पन्न भइसकेका छन्।

काठमाडौंस्थित एभरेस्ट होटेलमा आयोजित कार्यक्रममा सेती नदी जलविद्युत् आयोजना (२५ मेगावाट) को उद्घाटन समारोह सम्पन्न भएको छ। उक्त आयोजनाको प्रवर्द्धक संस्था सेती नदी हाइड्रोइलेक्ट्रिक कम्पनी लिमिटेड रहेको छ।

त्यसैदिन, मादी जलविद्युत् आयोजना (२४.८ मेगावाट) को वित्तीय बन्द (Financial Closure) को औपचारिक सम्झौता पनि सम्पन्न भएको थियो। मादी आयोजना पनि बज्र एनर्जी भेन्चर्स प्रा.लि. द्वारा प्रवर्द्धित हो।

यी दुवै आयोजनामा एनएमबि बैंक लिमिटेड वित्तीय साझेदारको रूपमा आवद्ध रहेको छ। बैंकले आयोजनाहरूको सफल कार्यान्वयनका लागि आवश्यक ऋण सहुलियत, व्यवस्थापन र सहकार्य उपलब्ध गराउने प्रतिबद्धता जनाएको छ।

कार्यक्रममा विभिन्न सरकारी अधिकारी, लगानीकर्ता, निर्माण कम्पनीका प्रतिनिधि तथा बैंक क्षेत्रका पदाधिकारीहरूको उपस्थिति रहेको थियो।

संबन्धित कम्पनीका प्रतिनिधिहरूले आयोजनाहरू समयमै सम्पन्न गरेर राष्ट्रिय ऊर्जा उत्पादनमा योगदान पुर्‍याउने प्रतिबद्धता व्यक्त गरेका थिए।