काठमाडौं महानगरका प्रमुख प्रशासकीय अधिकृत गुरागाईँ कार्यकक्षमा प्रवेश

काठमाडौं – तीन महिना १४ दिनपछि काठमाडौं महानगरपालिकाका प्रमुख प्रशासकीय अधिकृत सरोज गुरागाईँ कार्यालय पुगेका छन्। उनलाई कार्यालय प्रवेश गराउन कर्मचारीहरूले कार्यकक्षको ताला फोडेका छन्।

नगरप्रहरीको अवरोधका बीच गुरागाईँ कार्यालय प्रवेश गरेका हुन्। यसअघि, उपप्रमुख सुनिता डंगोल, कार्यपालिका सदस्यहरू तथा वडाध्यक्षहरूको उपस्थितिमा अनौपचारिक बैठक सम्पन्न भएको थियो। बैठकमा उपप्रमुख डंगोलले नगरप्रहरी प्रमुख राजु पाण्डेसँग ताला लगाउने आदेश लिखित वा मौखिक भएकोबारे प्रश्न राखेकी थिइन्। पाण्डेले मौखिक आदेशका आधारमा ताला लगाइएको बताएका थिए।

नगरप्रहरी प्रमुखको सो प्रतिक्रियापछि कर्मचारीहरू असन्तुष्ट बनेका थिए। सोही क्रममा कर्मचारीहरूले ताला फोड्दै प्रमुख प्रशासकीय अधिकृत गुरागाईँलाई कार्यकक्षमा प्रवेश गराएका थिए। कार्यालय प्रवेश गरेपछि गुरागाईँले नियमित हाजिरी गरेका छन्।

संघीय मामिला तथा सामान्य प्रशासन मन्त्रालयले एक महिनाअघि पत्र पठाएर गुरागाईँलाई काठमाडौं महानगरपालिकामै हाजिर गराउन आवश्यक वातावरण बनाउन अनुरोध गरेको थियो। मन्त्रालयको पत्र पठाइएकाे एक महिनापछि गुरागाईँ कार्यालय पुगेका हुन्।

यसैबीच, उपप्रमुख डंगोलले महानगर प्रमुख बालेन साहलाई कार्यालयमा उपस्थित भएर समस्या समाधानका लागि पहल गर्न सुझाव दिएकी छिन्। मेयर साहले नगरप्रहरी परिचालन गरेर गुरागाईँलाई कार्यालय प्रवेशमा रोक लगाएका थिए।

कर्मचारीहरूले मेयर साहलाई व्यक्तिगत ‘इगो’ का कारण प्रमुख प्रशासकीय अधिकृतलाई कार्यालय प्रवेशमा अवरोध गरेको तथा कर्मचारीहरूको नियमित तलबसमेत रोक्का गरिएको आरोप लगाएका छन्। यसअघि, मेयर साहले पुरानो बसपार्कस्थित काठमाडौं टावरको प्रक्रिया पूरा नगरी भवन निर्माणको नक्सा स्वीकृत गरिएको आरोपमा गुरागाईँविरुद्ध छानबिन समिति गठन गरेका थिए।