सुयोग श्रेष्ठ पुनः डिभान अध्यक्षमा निर्वाचित

काठमाडौं – संग्रीला डेभलपमेन्ट बैंकका प्रमुख कार्यकारी अधिकृत (सीईओ) सुयोग श्रेष्ठ नेपाल विकास बैंकर्स संघ (डिभान) को अध्यक्षमा पुनः निर्वाचित भएका छन्। संघको १९औँ वार्षिक साधारणसभाले उनलाई सर्वसम्मत रूपमा अर्को कार्यकालका लागि चयन गरेको छ।

साधारणसभाले संघका अन्य पदाधिकारीहरू पनि निर्वाचित गरेको छ। कामना सेवा विकास बैंकका सीईओ दिनेश ठकाली उपाध्यक्षमा चयन भएका छन् भने गरिमा विकास बैंकका सीईओ माधवप्रसाद उपाध्याय सचिवमा निर्वाचित भएका छन्। त्यस्तै, ज्योति विकास बैंकका सीईओ कपिल ढकाल कोषाध्यक्ष पदमा चयन भएका छन्।

नयाँ कार्यसमितिमा पाँच कार्यकारी सदस्यहरू निर्वाचित भएका छन्। लुम्बिनी विकास बैंकका नरेशसिंह बोहरा, साइन रेसुंगा विकास बैंकका प्रकाश पौडेल, महालक्ष्मी विकास बैंकका दिपेश लाम्साल, ग्रीन डेभलपमेन्ट बैंकका हरि बहादुर बुढाथोकी, र सप्तकोशी विकास बैंकका दिनेश पोखरेल कार्यसमितिमा निर्वाचित भएका छन्।

साधारणसभाले आर्थिक वर्ष २०८०/८१ को लेखा परीक्षण प्रतिवेदन, अध्यक्षको प्रतिवेदन, तथा आगामी आर्थिक वर्ष २०८१/८२ का लागि अनुमानित आय–व्यय स्वीकृत गरेको छ। साथै, संघले आगामी आर्थिक वर्षका लागि लेखा परीक्षक नियुक्त गरेको छ।

अध्यक्ष सुयोग श्रेष्ठले साधारणसभालाई सम्बोधन गर्दै संघका सदस्यहरूलाई विश्वासका लागि धन्यवाद दिएका छन्। उनले विकास बैंकहरूको हकहितको संरक्षण गर्दै बैंकिङ क्षेत्रको समृद्धिका लागि सहकार्य आवश्यक रहेको बताएका छन्। श्रेष्ठले सदस्य बैंकहरूबीच समन्वय र सहकार्यलाई प्राथमिकता दिने प्रतिवद्धता व्यक्त गरेका छन्।

साथै यस अवसरमा संग्रीला डेभलपमेन्ट बैंकका  प्रमुख सञ्चालन अधिकृत (सीओओ) अपूर्व प्रसाद जोशीले श्रेष्ठलाई बधाई ज्ञापन गरेका छन्।

जोशीले श्रेष्ठको नेतृत्व, दृष्टिकोण, र समर्पणले संस्था तथा समग्र बैंकिङ क्षेत्रलाई प्रेरणा दिइरहेको उल्लेख गरेका छन्। उनले श्रेष्ठको अध्यक्षतामा डिभानले आगामी दिनमा पनि वित्तीय क्षेत्रमा सकारात्मक योगदान दिने विश्वास व्यक्त गरेका छन्।

नेपाल विकास बैंकर्स संघ (डिभान) परिचय

नेपालभरिका विकास बैंकहरूको साझा संस्था नेपाल विकास बैंकर्स संघ (डिभान) ले वित्तीय पहुँच विस्तार, क्षेत्रीय समृद्धि प्रवर्द्धन, र नियामक निकायहरूसँग समन्वय गर्दै बैंकिङ क्षेत्रको हितमा काम गर्दै आएको छ।

संघको कार्यसमितिले सदस्य बैंकहरूको नीति निर्माण, वित्तीय साक्षरता कार्यक्रम आयोजना, हरित वित्त प्रवर्द्धन, र जोखिम व्यवस्थापन जस्ता विषयहरूमा ध्यान केन्द्रित गर्दै आएको छ। साथै, बैंकिङ प्रक्रियाको मापदण्ड निर्धारण, सुशासन प्रवर्द्धन, र नियामकीय अनुपालन सुनिश्चित गर्न संघले सक्रिय भूमिका खेल्दै आएको छ।

श्रेष्ठको पुनःनिर्वाचनले उनको नेतृत्वमा सदस्यहरूले देखाएको विश्वास प्रकट गरेको छ। उनको अनुभव र दृष्टिकोणले नेपाली बैंकिङ क्षेत्रमा देखा परेका चुनौती समाधान गर्दै नयाँ अवसरहरू सिर्जना गर्न योगदान गर्ने अपेक्षा गरिएको छ।