आजदेखि त्रिभुवन विमानस्थल दैनिक १६ घण्टा सञ्चालनमा: पूर्वाधार विस्तारमा ६०% प्रगति

काठमाडौँ , माघ १९ । कात्तिक २३ गतेदेखि विमानस्थल दैनिक १० घण्टा बन्द हुँदै आएको त्रिभुवन अन्तर्राष्ट्रिय विमानस्थल शनिबारदेखि दैनिक १६ घण्टा सञ्चालनमा आउने भएको छ। विमानस्थलको पूर्वाधार विस्तारका क्रममा सञ्चालनमा रहेका तीन प्रमुख आयोजना मध्ये धावनमार्गको ७५ मिटर नजिकको कामको भौतिक प्रगति ६० प्रतिशत पूरा भएपछि विमानस्थल सञ्चालनको समयमा वृद्धि गरिएको हो। शनिबारदेखि भने विमानस्थल बिहान ७ बजेदेखि राति ११ बजेसम्म सञ्चालनमा रहनेछ। यसअघि विमानस्थल राति १० बजेदेखि बिहान ८ बजेसम्म बन्द गरिन्थ्यो।

प्राधिकरणका सूचना अधिकारी ज्ञानेन्द्र भुलका अनुसार , विमानस्थलको पूर्वाधार विस्तारका कामहरू जस्तै समानान्तर ट्याक्सी वे, अन्तर्राष्ट्रिय एप्रोन, र ह्याङ्गर क्षेत्र विस्तार काम जारी रहेको छ। यसले विमानस्थलको क्षमता वृद्धि गर्नेछ। विशेषगरी, धावनमार्गसँग जोडिएका कामको ६० प्रतिशत प्रगति भइसकेकोले शनिबारदेखि विमानस्थलको समय दुई घण्टा बढेको हो।

प्राधिकरणका अनुसार, २०२० मेमा शुरू भएको र २०२६ फेब्रुअरीमा सम्पन्न हुने योजना अन्तर्गत विमानस्थलको भौतिक कार्य ४० प्रतिशत सम्पन्न भइसकेको छ। कुल १५ अर्ब रुपियाँ खर्च हुने उक्त परियोजनाले विमानस्थलको वार्षिक क्षमता ८०(८५ लाख यात्रुबाट १ करोड २५ लाख यात्रुसम्म पुर्याउने लक्ष्य राखिएको छ।

सन् २०२४ को ११ महिनामा त्रिभुवन अन्तर्राष्ट्रिय विमानस्थलबाट ४४ लाख ४५ हजार २३९ अन्तर्राष्ट्रिय र ३७ लाख २७ हजार ६५१ घरेलु यात्रुहरूले हवाई यात्रा गरेका छन्।