रवि लामिछानेका तर्फबाट थुनछेक बहस जारी, आजै आदेश आउने सक्ने

काठमाडौँ , माघ २ । स्वर्णलक्ष्मी सहकारी ठगी मुद्दाका प्रतिवादी रास्वपा सभापति रवि लामिछानेका तर्फबाट बहस सुरु भएको छ । लामिछानेलाई जिल्ला अदालत काठमाडौंमा उपस्थित गराएको छ । काठमाडौंको स्वर्णलक्ष्मी सहकारीको रकम हिनामिना प्रकरणमा उपप्रधानमन्त्री तथा गृहमन्त्री समेत रहेका लामिछानेमाथि अनुसन्धान भइरहेको छ । लामिछानेका तर्फबाट वरिष्ठ अधिवक्ता सुशील पन्तले बहस गरिरहेका छन् । गत आइतबार आफैँ अदालतमा उपस्थित भएर बयान दिएका लामिछानेमाथि सोमबारदेखि थुनछेक बहस जारी छ ।

सोमबार उनीविरुद्ध सरकार र जाहेरवाला तर्फका वकिलहरूले बहस गरेका थिए । उनीहरूले रविलाई थुनामै राख्नुपर्ने तर्क पेस गरेका छन् ।लामिछानेमाथि सुर्यदर्शन सहकारी प्रकरणमा आर्थिक अनियमितताको आरोप छ। यसअघि, कास्की जिल्ला अदालतले यो मुद्दामा उनलाई ६५ लाख रुपैयाँ धरौटीमा रिहा गर्ने आदेश दिएको थियो।

प्रहरीको अनुसन्धानले स्वर्णलक्ष्मी सहकारीबाट गोर्खा मिडिया नेटवर्कमा कानूनी प्रक्रिया विपरीत ५ करोड ७८ लाख ९८ हजार ४८० रुपैयाँ स्थानान्तरण भएको तथ्य बाहिर ल्याएको छ। सरकारी वकिल कार्यालयले यही आधारमा लामिछानेविरुद्ध बिगो दाबी गर्दै मुद्दा दायर गरेको छ।