विश्व पर्यटन दिवस : दिगो पर्यटन विकासमा नेपालको प्रतिबद्धता

काठमाडौँ , असोज ११ । विश्वभर विभिन्न कार्यक्रमको आयोजना गर्दै विश्व पर्यटन दिवस मनाइँदैछ। आज सेप्टेम्बर २७ अर्थात् ४५औँ विश्व पर्यटन दिवस नेपालमा पनि विविध कार्यक्रमको आयोजना गरी मनाइँदैछ ।   यो दिवस पर्यटनको महत्व र यसको सामाजिक, सांस्कृतिक, र आर्थिक योगदानलाई उजागर गर्नका लागि मनाइन्छ। संयुक्त राष्ट्र संघको विश्व पर्यटन संगठन (UNWTO)ले यो वर्षको थीम “पर्यटन र विकास” चयन गरेको छ, जसले पर्यटनलाई दिगो विकासको एउटा महत्वपूर्ण हिस्सा बनाउनको लागि सन्देश दिन्छ।

नेपाल, प्राकृतिक सौन्दर्य र सांस्कृतिक विविधताको धनी देश भएकोले, यस दिवसलाई विशेष महत्वका साथ मनाइँदैछ। नेपालमा पर्यटन उद्योगले देशको अर्थतन्त्रमा महत्वपूर्ण योगदान पुर्याएको छ, र कोरोनाविरुद्धको लडाइँपछि पुनः पर्यटनलाई प्रवर्द्धन गर्ने प्रयास भइरहेको छ। यहाँका प्रमुख गन्तव्यहरू, जस्तै सगरमाथा, पोखरा, र लुम्बिनी, विश्वभरका पर्यटकहरूका लागि आकर्षणको केन्द्र बनेका छन्।

दिवसको सुरुवातमा त्रिभुवन अन्तर्राष्ट्रिय विमानस्थलमा पहिलो उडानबाट आउने विदेशी पर्यटकहरूको स्वागत गरिने कार्यक्रम आयोजना हुनेछ। साथै, बिहान ठमेलमा प्रभातफेरी पनि गरिनेछ, जसमा पर्यटन मन्त्रालय र सम्बन्धित संस्थाका प्रमुख र प्रतिनिधिहरू सहभागी हुनेछन्।

आजको अवसरमा विभिन्न स्थानमा सांस्कृतिक कार्यक्रम, फोटो प्रदर्शनी, र टेबल वार्ता आयोजना गरिनुका साथै, स्थानीय स्तरमा पर्यटन प्रवर्द्धनका लागि योजनाहरू प्रस्तुत गरिने छन्। यसैबीच, सरकारले समावेशी र दिगो पर्यटनको विकासमा ध्यान केन्द्रित गर्ने प्रतिबद्धता जनाएका छन्।

दिवसको अवसरमा पर्यटन मन्त्रालय, नेपाल पर्यटन बोर्ड, पर्यटन विभाग र विभिन्न पर्यटन संघसंस्थाहरूले विविध कार्यक्रमहरूको आयोजना गर्नेछन्। मन्त्रालयका सहसचिव एवं प्रवक्ता रामकृष्ण लामिछानेका अनुसार, यो दिवसलाई भव्य र सभ्य रूपमा मनाउनका लागि सरकारी तहमार्फत निजी क्षेत्रका पर्यटन व्यवसायी, गैरसरकारी संस्थाहरू र समुदायको सहकार्य गरिनेछ।

नेपाल पर्यटन बोर्डका अध्यक्षले भने, “हाम्रो उद्देश्य भनेको पर्यटकीय स्थलहरूमा दिगो विकासलाई प्रवर्द्धन गर्दै स्थानीय समुदायलाई समृद्ध बनाउन हो।” विश्व पर्यटन दिवसले सबैलाई पर्यटनको महत्व र यसको विकासमा संलग्न गराउने एउटा अवसरको रूपमा काम गर्नेछ।

यस अवसरमा, पर्यटकहरू र स्थानिय बासिन्दाहरूबीचको सम्वन्धलाई बलियो बनाउन र स्थानीय संस्कृतिलाई संरक्षण गर्ने प्रेरणा दिने अपेक्षा गरिएको छ।