संसदीय छानबिन समितिले आज रवि लामिछानेसँग बयान लिने

काठमाडौँ , ७ भदौ । सहकारी संस्था बचत रकम दुरुपयोग सम्बन्धमा संसदीय छानबिन विशेष समितिले पूर्वउपप्रधानमन्त्री तथा गृहमन्त्री रवि लामिछानेलाई सोधपुछका लागि बोलाएको छ । रास्वपा सभापति लामिछानेलाई सोधपुछका लागि शुक्रबार २ बजे बोलाइएको समितिका सभापति सूर्य थापाले जानकारी दिए। लामिछानेलाई गोरखा मिडिया नेटवर्क प्रालिको प्रबन्ध निर्देशकको हैसियतमा सोधपुछका लागि बोलाइएको हो ।

विभिन्न सहकारीको रकम गोरखा मिडिया नेटवर्कमा कम्पनीका तत्कालीन पदाधिकारीहरूको खातामार्फत् गएको देखिएपछि समितिले उनीहरूलाई बोलाएर सोधपुछ गरिरहेको छ। गोरखा मिडिया प्रालिका क्रियटिभ डाइरेक्टर तथा नोबडी प्रोडक्सन प्रालिका सञ्चालकसमेत रहेका रास्वपाका सहमहामन्त्री विपीनकुमार आचार्यसँग पनि समितिले सोधपुछ भएको थियो।

समितिले लामिछानेसँगै सञ्चालक छविलाल बन्जाडे जोशीलाई पनि आज बिहान ११ बजे नै सोधपुछका लागि बोलाइएको छ ।